好工難求，好人工更難求，好老闆更加係難難難求！「電訊魔童」王維基嗰檔城市電訊（1137）旗下嘅香港寬頻，噚日宣佈，今年嘅「CXOoftheFuture」管理人員培訓計劃又開始招生喇，起薪點仲大幅調高60%，由2.2萬蚊加到3.6萬蚊，同政府AO睇齊！Train夠18個月之後，起標每月有3萬幾蚊，仲有機會做老王（即係集團主席王維基）嘅私人助理，點都無做AO咁悶嘅！
目標請兩個 月底截止報名
老王嘅親信話，今年已經係第6年搞CXO，年年反應都好熱烈，上年就有793個人報名，無話年年規定要請幾多人，試過有年一次過請咗6個，有一年就一個都冇請，今年嘅目標係請兩個……如果華華唔係喺社會謀生超過兩年，已經唔合資格，都想即刻趕喺呢個月31號截止報名前申請o架！
係咪因為老王offer咁高人工就話佢係好老闆呢？查實唔係咁，華華識咗老王一段唔短嘅日子，都幾清楚佢點對公司上上下下，好多policy都幾得人心o架，好似之前派花紅畀啲員工（平均係1.9個月），竟然可以畀佢哋將花紅換成假期（半個月花紅換10日），等佢哋多啲時間實現自己嘅夢想，都唔可以唔寫個服字畀老王！
因為老王咁識do，所以佢寶號好多員工都唔會輕易話走，舊年年尾，佢哋頒「老人牌」，一共使咗113萬蚊，打咗180個金牌（共重96.5盎司），有140個人拎5年牌、30個拎10年牌、10個拎15年牌……咁大家話老王算唔算係好老闆？
李華華
mailto:[email protected]