熱刺中場雲達華治嘅老婆施維雅認真好波，大家咪心邪，我求大俠指嘅唔係佢嘅身材，而且講緊佢嘅足球技術，唔講你唔知，原來佢有兩度散手。早前佢喺廣告入面表演控球，啲技術勁到你唔信，簡直仲厲害過好多英超球員。
以樣靚身材正而聞名英超嘅施維雅，係一個男士護理用品嘅代言人，先排就喺廣告嘅製作花絮「騷哥利」，演一演自己嘅控球技術。雖則佢當時着住晚裝，腳下仲踩住對幾吋高嘅高踭鞋，但一啲影響都冇。準備好之後，佢先用右腳腳面剔個波兩吓，之後再用右腳同埋左腳後踭剔多兩吓，繼而再表演膊頭控波，然後用右腳同左腳腳面輪流剔多三吓（小圖）。
咁都未算，施維雅用右腳腳面控停個波之後，再大腳踢高，自己再180度轉身，之後用右腳腳面黐個波落嚟，再用右膝同埋左膝輪流控多3吓。
控球12秒又剔又射
以為施維雅嘅表演到此為止，原來之後先至係戲肉。佢用膝頭哥控完波之後，再用左腳腳踭踢個波去自己面前，然後右腳拉弓勁射，差啲連個鏡頭都畀佢省爆。而佢嘅表演頭尾合計成12秒，除咗個波冇落過地下之外，動作仲一氣呵成，所以有唔少網友認為喺用電腦執過。我求大俠覺得，單憑一對肉眼真係好難判斷係咪經過加工，但可以肯定嘅係，施維雅控波同埋射波時嘅動作，一啲都唔生硬，而且仲功架十足，真係媲美英超班球星。
話晒施維雅嘅老公雲達華治喺荷蘭國家隊同埋熱刺嘅主力，而且仲以腳法秀麗見稱，加上施維雅都好鍾意足球，所以識得用身體各部位控波，而且似模似樣，我求大俠認為一啲都唔出奇。唔怪得有網友講笑咁話，熱刺領隊哈利列哈不如唔好借碧咸，簽施維雅好過啦，等佢用美色同球技搞掂啲對手。