梁展文事件引發社會高度關注退休高官下海嘅利益衝突問題，公眾要求政府提高監管高官退休後從商限制，搞到已屆退休之齡，但仍然有心有力嘅公僕好有意見。
「流水的官」施祖祥噚日就為後輩發聲，指現時規限公務員退休後繼續工作限制已經好嚴謹，「過冷河」時間一再延長，睇唔到有需要要加強限制。佢以廉署執行處前助理處長朱敏健過檔監警會做秘書長為例，「監警會等人用，兩個部門工作冇衝突，廉署亦需要佢放晒所有假期先至返工。我覺得政策已經矯枉過正，側重咗社會憂慮嘅方面，過晒龍，我認為兩者應該取得平衡。」
施公，人人學似你咁清心寡慾，八方梗放心啦，可惜唔係呢。