蒙嘉慧和鄭伊健拍拖多年，一直各忙各工作。蒙嘉慧近日在新劇《誘情轉駁》少有飾演反派，她開心透露用心演出扮歇斯底里，獲不看劇的男友讚賞，更忍不住將被指皮膚差卻換來工作機會，拿來自嘲一番。連生兩女的張燊悅，則慶幸沒有徐子淇追仔壓力，樂得穿舊衫、包雲吞湊女。
蒙嘉慧、張燊悅和胡定欣昨日在尖沙嘴TheOne，出席Kiehl's護膚品活動，三人更穿上白色護士袍、醫生袍，講解護膚心得。蒙嘉慧之前被雜誌彈皮膚差、有魚尾紋，她昨日說：「我皮膚唔係好差，邊個笑時冇表情紋？」她謂不會想去打botox改善：「自問都好捨得花錢補救，打嘢入去就冇乜安全感，有啲人為呢樣連命都唔要。」
皮膚差換來工作
在無綫新劇《誘情轉駁》中，蒙嘉慧飾演反派，前晚播出的情節，她更要表現得歇斯底里，她開心說：「自己好畀力做，有幾個朋友打電話嚟，都話好恐怖，話我唔係只有一個面孔，聽完真係好有滿足感。」
問到男友鄭伊健有否讚賞？蒙嘉慧難掩喜悅說：「有呀，佢平時好少睇劇，佢都有打嚟，外面反應好，真係有啲感動，因為有人肯定係好值得。」她更趁機樂觀自嘲一番：「家演反派角色啲人都好接受，好似記者話我有眼紋提早衰老，之後反而有人打嚟，搵我做護膚品工作，有缺陷都好！」
提到有指約滿無綫不續約，才淪為第二女主角，蒙嘉慧就強調自己是反派，不是第二女主角，她說：「我係轉咗做部頭合約，我唔做明星，想做演員，TVB一日用我，我一日都係TVB嘅人。」
張燊悅樂做主婦
張燊悅之前再生一個女，她謂仍差十幾磅才收身成功，她更為湊女連衣着都改變，她說：「家啲衫唔可以有珠片，驚拮親佢，越舊越腍嘅衫就最好。我家工作主要係治家，等陣都要趕返去包雲吞畀大女食。」徐子淇連生兩女，再懷孕，老爺四叔講明再生女會失望，張燊悅就說：「我就順其自然，我鍾意女多啲，touchwood，冇呢啲壓力，好享受有兩個小朋友嘅生活。」
採訪：RitaLeung
攝影：WongManWai
