除咗「維基360」，噚日另一樣嘢都恨死華華嘅，就係老闆請遊埠！舊年個樓市㷫烚烚，政府呢邊頭都大晒，但係班地產經紀就一於少理，繼續爆數，營業額節節上升。代理賺到笑之餘，代理行嘅老闆就更加笑逐顏開，荷包暴漲，有良心嘅，仲會同員工分享。好似兩間細代理行，祥益地產同置業18，都請舊年達標嘅下屬去遊埠。
置業18喺今個月底就一行40人去南韓玩幾日，鍾意掃貨又好，滑雪又好，齊齊輕鬆吓，為新一年叉定電，返嚟再搏殺過。
祥益地產老闆汪敦敬（圖）早排出手仲豪氣，請咗12個員工暢遊巴黎，仲包晒機票、食宿！除咗食法國大餐，當然唔少得遊下賽納河，真係聽見都開心。聽聞大行嘅中原地產，出手都唔少，今年AnnualDinner一於搞大啲，圍數由舊年130圍，加碼到200圍。頭獎仲有3萬蚊旅遊禮劵、3D電視……唔出埠都唔錯喇！