家facebook當道，連《TIME》都揀fb創辦人做年度風雲人物，就知唔玩fb有幾out，香港高官有樣學樣，房屋局長鄭汝樺喺fb收集高鐵意見原來只此一次，下不為例；特首煲呔有個名為「上亞厘畢道」戶口，連財爺鬍鬚曾噚日都喺fb搞花臣，目的都係想聽到後生仔對施政意見。
可惜，呢啲網絡搞作幫助唔大，港大社工系調查發現，多數80後冇試過上網向政府提意見，七成受訪者表示唔會信政治人物會講真話。
耍官腔討人厭
呢個調查由港府贊助港大社工系喺舊年進行，以小組、電話及上網共訪問咗千幾個80後、90後年輕人。對於後生仔沉迷上網，卻唔願透過網絡向政府提意見呢個現象，負責調查嘅港大教授葉兆輝同八方分析，相信係因為後生仔認為政府搞fb、開blog只係做騷居多，冇heart，就算官員出席論壇，名為聽民意，實際係耍官腔，人人效法林D9咁自甘做人肉錄音機，80後、90後又有乜興趣與官對話呢？
葉教授指呢種「數碼代溝」，令官員誤解民情，好似官員成日以為後生仔好「恨」買樓，但調查發現後生仔怒火源自不滿政府偏幫地產商，而唔係埋怨唔夠錢畀首期「上車」，官民想法有咁大落差，就算rap多幾首歌，搵埋「天氣女神」黃婉曼出手軟銷施政報告，後生仔一樣唔like。
起錨民望更低
官員起錨上網結果超錯，結果係令民望更低落，調查發現超過七成受訪者唔信政治人物講真話，即係覺得政客講乜都信唔過，葉教授指可能同公投爭拗有關，公民黨忽然激進撐公投，民主黨疑似河蟹，保皇黨更加係講都唔好信，正如譚耀宗話反對申亞撥款，最後結果係點，八方只能夠講，聽其言，觀其行，難怪後生仔覺得政客講一套做一套，梗係對佢哋言論打個問號啦！
如果人人學似溫總咁好戲，係最佳男主角，仲叫人點信政客！
同場加映
財爺fb冇誠意
雖然後生仔覺得高官玩facebook冇heart，不過高官自得其樂，財爺鬍鬚曾噚日終於喺fb開戶口，同時提供名為「假如我係財爺」遊戲，網民可以試吓做財爺，分配社福、教育、房屋、基建等開支，亦可選擇是否加稅或派糖，之後埋單計數，睇吓呢個「假」預算案赤字或盈餘，最後仲有個特別功能就係模擬傳媒如何評價（圖）。
市民覺得高官諮詢冇誠意唔係冇道理，呢個遊戲畀人嘗試做財爺，但冇得畀人選擇減高官人工同埋減稅，冇得揀，點算係老闆呀！真係想聽民意，唔好咁兒戲啦。
mailto:[email protected]