港股升勢持續，恒指收23668，再升232點，成交上番7字頭，有764億元，期指升勢更勁，大升284點，由低水變番高水；上升正股接近800隻，上升層面繼續擴散。
國藝控股（8228）去年11月中創出1.67元新高後，足足唞咗個半月，調整到1.20元水平，上周五已見有異動，噚日由低位大幅反彈，高收1.39元，大升0.18元，升幅14.8%，成交雖然大增近倍到800多萬股，但顯而易見，沽壓唔大，貨源應已落在強者手中，歸晒邊。
國藝一支大陽燭抽破3條平均線，MACD亦會好快出現「雙牛」入貨訊號，第一個目標將係前高位1.67元，整固後再上，可見2.10元。
國藝大變身，進軍內地影視城、主題公園和酒店業務，亦已儲足彈藥，策略投資者同基金對其前景都有好大信心，以發展完成初期一年可賺2至3億元計，股價即使升到2字頭，仍然係好吸引。
另一隻又係剛剛調整完成，再起升浪嘅先進半導體（3355），短線預期亦會有3至4成升幅，可追入。同樣係去年11月中，先進一日之內大升近5成，由0.47元衝上0.70元，其後出現調整，本欄在11月18日股價0.57元時作出推介，目標0.80元，11月30日最高見0.91元，超額完成。
12月開始，先進進入調整期，但幅度唔大，只低見0.72元，昨日升勢再起，一舉而升上10日同20日線之上，MACD亦見轉強，快出現雙牛，以量度升幅計，今個升浪目標可見1.15元，升幅45%。
營運漸入佳境
先進業務為晶圓銷售，今年扭轉去年虧蝕之勢，營運漸入佳境，2010年（12月年結）首3季獲利9301萬元（人民幣．下同），每股盈利6.06分，去年同期則虧蝕9117萬元。期內營業額7.08億元，升49.3%。
雖然去年第4季屬於淡季，但保守估計全年盈利仍可達1.33億元，每股盈利8.7分，折約10港仙，以目標價1.15元計，PE亦只11.5倍，吸引力仍大。
郭兆誠