唔知係咪嫌前排喺網上撰文狠批政府開徵額外印花稅唔夠喉，噚日立法會搞公聽會，畀大家講吓對額外印花稅嘅睇法，股壇長毛DavidWebb（圖）直頭殺入立法會「發表意見」，可謂先筆伐而後口誅！
Webb除咗重申政府咁樣係違反《基本法》，妨礙市民出售物業而唔使受罰嘅條例，講講吓仲好似議員「上身」咁滔滔不絕，話兩年內賣樓要交額外印花稅，係剝奪部份業主賣樓嘅權利，加上買家唔會補貼賣方，咁可能會影響因為財困而要賣樓嘅一族！
阿Webb又話，樓市泡沫會吸引投機者，但唔係由投機者造成，而係經濟活動造成，所以政府唔應該混淆因果關係。佢未去立會之前，Webb接受彭博資訊訪問嗰陣，直頭話政府唔應該做嘢，由得個資產泡沫自己爆破，咁至係對付泡沫嘅洽當方法……啲發展商聽到係咪好開心呢？