維基解密早前披露，香港喺08年奧運馬術賽事期間被列為恐襲目標，被指刻意隱瞞情報嘅保安局局長李少光，噚日喺立法會保安事務委員會繼續死撐「從來冇逃避公佈（反恐情報）」，指好多所謂嘅情報都係流料，「冇指定幾時、邊度嚟、襲擊喺邊度」。
李少光叫議員放心，因為警務處嘅情報評估小組好專業，會根據情報來源、國際形勢等因素評定本港嘅恐襲威脅級別，有乜事一定會吹雞。涂謹申追問評估小組成員名單，李少光即時面有難色，話講咗就等於披露本港反恐實力，有損公眾利益。
阿涂當堂嬲到臉紅耳熱，林大輝突然插嘴：「如果小組得一個人點算？」即時點醒阿涂：「係喎，如果個主席係警司仲得了！」李少光話返去會同警務處一哥傾吓，睇吓可唔可以搵日同議員開個保密會議，交代小組名單喎。