老友強哥開餐廳，不以賺大錢為目的，只在乎過癮，得閒招呼吓老友而已，十幾年前在灣仔軒尼詩道開中餐，後來在蘇豪區開法國餐，及禮頓道至到依家在旺角開西餐廳，就似乎蝕多賺少，不過蝕錢唔入肉，強哥當作娛樂費、應酬費而已，有佢咁樣嘅老闆，蝕本都肯創造職位，張建宗局長應該讚賞佢對降低本港失業率嘅貢獻。
既然蝕本，邊有預算去賣廣告吖，莫講話報紙廣告，就算係小型之網上廣告，強哥都唔肯賣，你估係麥當勞，大家樂呢啲大集團咩。個零月前，有飲食介紹網站搵到上門，請強哥落廣告，強哥醒目，立即拖住，再上網站一睇，自己間餐廳在該網站從來無人提，即係平時該網站都對佢不屑一顧啦。強哥餐廳一來唔想有額外使費，二來覺得該網站冇誠意，一口拒絕之。
點知拒絕之後，生意仲衰過以前，一個月內成間餐廳靜雞雞，生意比以前更少，強哥不明所以，直至一位老友call佢：「喂，我今日係iPhone食飯網睇到人地寫到你間餐廳好曳喎，有冇得罪人呀？」強哥急忙上網一查，唉吔，自己間餐廳竟然已經「榮登」旺角食肆行列，不過係有評語指責多多嗰種，話佢間餐廳生蠔太鹹懷疑浸過鹹海水喎！
強哥向左丁山訴苦，力指佢地嘅生蠔由法國空運到港，絕不以本港鹹水浸之，左丁山話：「搵番該網站賣番一個月廣告，可唔可以挽回頹勢呀？」強哥話：「豈有此理，雖然無證無據話人地，一於寧死不辱。」左丁山於是諗起，好多年前曾有泰國所謂傳媒大亨，來香港找編輯S做亞洲區出版總裁，出手甚高。編輯S立即飛去曼谷到該公司睇一睇，發覺裝修陳舊，設備落後，點似係出版王國呀，但見到佢啲雜誌有好多廣告噃，有啲來自出名嘅公司。於是搵曼谷賓架P查一查，賓架P話：「你都係返香港好嘞，我地泰國商界每晚有好多應酬，沖涼、送禮物等事情，一啲老闆會收到照片與草擬稿件，跟住就有記者打電話嚟要求confirm照片中人是否自己及稿件內容。第二日，老闆叫市場部在某雜誌落廣告，以後就冇事情發生。阿黃你明白人地點樣發達未？」即刻明白晒，編輯S第二朝就坐飛機回港咯，無謂向嗰位所謂傳媒大亨求證吖。