曾參與屯門公路、青馬大橋等大型基建嘅土木工程拓展署署長蔡新榮退休在即，做咗公務員32年，佢話最開心係有多啲時間打橋牌同陪家人，又話暫時冇計劃下海幫地產商打工。
蔡新榮73年港大土木工程系畢業，06年升做署長，親身參與香港過去逾30年基建，印象最深係全程參與設計、興建青馬大橋。對於近年民意唔輕易俾新基建過關，蔡新榮不以為然，話70、80年代興建西環山道天橋時，要拆卸兩邊大廈露台，居民都冇乜意見，家世界唔同晒，咁樣拆民居，後果不堪設想。蔡新榮又話香港人口增加，有住屋需要，興建鐵路、隧道挖出大量泥土，家陣唔用嚟填海要運到內地處置，所以佢認為公眾要重新理性討論填海問題，「維港唔填大家有共識，但抹煞晒（其他海域）就唔好」。下任署長韓志強現年52歲，明日履新。