乜嘢叫弄巧反拙呢？特區有個人辦。特首煲呔聖誕節前搵潮人MCJin合作，rap咗首《RapNow2010》，大家對呢首歌評價，可以用「有口皆悲」、「有目共倒」嚟形容，網上嘅惡搞版反而仲受歡迎。煲呔扮潮提升民望算盤顯然計錯數，港大民意調查計劃上月17日至22日做民調，噚日公佈結果顯示煲呔最新民望53.3分，較12月初跌1.1分。
54%指改善民生不力
Rap歌救唔到民望，仲連累埋政府，最新民調數字顯示市民不滿政府表現比率上升五個百分點至三成半，係三個月新高。市民不滿政府，當然唔係因為唔like煲呔rap歌不倫不類咁膚淺，港大民調計劃最新調查發現，市民對特區政府改善民生不力不滿意比率達54%，較9月大幅上升10個百分點，反映即使政府出招打壓樓價，市民依然感覺唔到受惠，今年通脹殺到埋身，樓價越壓越升，相信煲呔民望易跌難升。