三人行必有我師，聚會時與朋友閒談，不時係值得公諸同好嘅寫稿題材，又如阿仔冲凉嗰篇關於泡沫幾時爆嘅文，自己都覺得抵死，可見睇股可以好生活化。
一直從事金融領域工作，好多時道聽塗說題目都離不開本業，有專睇工商客嘅資深賓架，最近奔走相告，話經營產銷布料嘅客戶再三提醒佢趕快買定未來兩年要着嘅衫，尤其係棉質衫褲。原因唔難明，棉花漲價吖嘛，之不過棉質衣料加價，橫向會影響埋尼龍纖維質料價格，呢個冬天市場上又輕又暖嘅「仿絲棉」風衣，一睇英文就明解係Polyester、Rayon等石油副產品，通通都係棉花替代品，所以早排棉花漲價會令儀征化纖（1033）股價急升。
雖然通常都係賓架畀意見，但當你個客係某行業專家，佢嘅睇法就絕對有意義，起碼傳到我耳朵就係好實用嘅資料。唔係危言聳聽，我已經開始趁歲晚大減價掃定多幾件長青款式嘅冬天Top。
棉花漲價蠶食紡織股盈利
忽然好慶幸自己前年瘦身略有小成，一口氣買夠呢兩年要着嘅返工衫，反正自己唔係太在乎個Look，冇料嘅先至整色整水，掛住搞個Look盞唔得閒做功課。
全球QE後遺症將會體現於惡性通脹，游資太多，由貴金屬炒落去，炒到冇嘢可以炒，炒到去農產品，明顯係要炒到底去到盡，炒家盡地一煲錢搵錢，連包住你層皮嗰塊布嘅上游工業股都係題材。
農產品如玉米等飼料漲價，最終會導致豬牛雞鴨漲價，對棉紡紗企業而言，棉花隨時佔總成本達75%，09年仲係每噸1.4萬元人民幣，唔少前年年底低價大量囤積棉花嘅紡紗企業，今日都仲享受緊廉價庫存，然而一旦庫存用盡，按採購價高達每噸2.5萬元人民幣嘅新棉，企業隨時轉盈為虧。至於布料批發價更有如溫水煮蛙，短短一季漲幅達兩成以上，如此下去，紡織股毛利率變化特別值得關注，皆因往績參考價值已大打折扣。
胡孟青
作者為獨立股評人