新年新面孔亮相，康泰旅行社一姐劉美詩去年退下，太子爺黃進達接班，噚日正式亮相，首次同傳媒飯敍，介紹公司發展，仲透露康泰4月加人工，農曆年前會發約700萬元花紅。
太子登場表現有板有眼，十分淡定，老竇黃士心老懷安慰，噚日都有到場為個仔加持，拜託傳媒「睇實我個仔」。黃進達雖然係太子爺，不過接手老竇生意都要由低做起，03年讀理大時，被老竇安排入康泰做見習生，幫客人訂房、租車乜都要做。
黃士心指要個仔半工讀，係希望佢早啲知道搵錢艱難，唔好以為老竇有盤生意就可以嘆世界，不過始終係太子爺，所以雖然只係兼職都有全職人工。黃士心話個仔唔似佢咁有霸氣，性格比較謙虛，係好事。好多太子未掌實權時都係咁鵪鶉，正常。