朗拿甸奴唔只扭波叻，令敵方球員陀陀擰，佢嘅去向亦令我哋體記頭痕，因為嗰頭有3間巴甲球會斟佢，法林明高仲講到簽硬佢咁滯，但同時間一度盛傳英超布力般流浪滿有信心以重金利誘，據報13萬鎊周薪引佢加盟。橫睇掂睇，莫講話布力般後嚟否認斟「細哨」，就算真係出手，「細哨」都未必睬佢。
布力般唔認重金斟介
關於布力般向AC米蘭提出以600萬鎊斟「細哨」，並出13萬鎊周薪引佢過檔呢單嘢，本來唔係流料，因為「細哨」經理人已經證實呢件事：「布力般係接觸過我哋，同時仲有其他英超球會，但係資料保密。」不過布力般到禮拜一就否認。點都好，「細哨」若果加盟布力般肯定生活困難，先講佢近年起動跑步都慢幾拍，要應付節奏明快、吓吓埋身肉搏嘅英超未免難啲啩？
再講，「細哨」不嬲喜歡陽光與海灘，佢睇到近期英國受風雪吹襲，怕且都唔開胃；除咗錢，貪有條大水喉射住，諗唔到佢要臨老入英超囉。呢位前世界足球先生近日身處巴西，同友人四圍玩，有傳佢母會甘美奧、法林明高同彭美拉斯都斟緊佢。前日至同佢食完晏嘅阿祖安奴，就踢爆「細哨」屬意法林明高：「呢個係佢夢想，唔講錢，唔講歐洲盃賽參賽機會，最緊要開心。」
愛里約熱內盧陽光海灘
消息指，法林明高已經準備好一張兩年半合約，仲列明計埋獎金同埋出場費等等，佢每星期都有超過10萬鎊收入喎。純粹講錢，又唔係真係差布力般太多。法林明高講到好有信心簽實佢：「我哋經濟條件好過甘美奧，亦知道佢好鍾意里約熱內盧嘅陽光與海灘。」唔知「細哨」最後情歸何處，只知若果回流巴甲就有望同「大哨」同場較量，呢位哥連泰斯前鋒近日出席新年派對，外形真係肥到隻豬咁，係時候修吓身。