村代表選舉周日起一連四個星期日舉行，鄉紳小圈子選舉甫開鑼就有意外賽果，大嶼山南區鄉事委員會1月2日舉行嘅居民代表選舉中，有兩個選區僅以一票之差定勝負，分別係䃟石灣候選人AndrewBrown以9比8僅一票之差勝出，涌口（北）嘅張日強則以121票對120票擊敗現任離島區議員、有民建聯同鄉事背景嘅黃福根，獲選為居民代表。
黃福根係現屆村代表兼區議員，一直被看高一線，最終以一票落敗令唔少鄉事中人好驚訝，議論紛紛發生乜事。社民連陳偉業解謎，指涌口（北）係少數有在囚人士選民嘅選區，關鍵一票可能係在獄中投下，如果屬實，當年為在囚人士爭取投票權嘅長毛真係功不可沒。
未來三個星期日都會有村代表選舉，重頭戲在1月23日，事關鄉議局主席劉皇發係咪可以喺龍鼓灘冧莊原居民代表，屆時揭曉。