「細哨」冇份落場嘅AC米蘭友賽阿爾阿里，結果紅黑兵團由施多夫同埋巴列達一老一少各入一球贏2:1，揚威阿聯酋。不過AC贏波代價就唔細，羅賓奴喺比賽中追波時無緣無故撞向場邊嘅攝影機，導致膝傷，睇佢受傷後表情痛楚，而離場時隻腳紮晒繃帶，又要用冰袋敷住行；AC後日歇冬後首場作客卡利亞里嘅意甲，隨時唔使預佢。
卡斯辛奴首度披甲
AC米蘭目前鋒線傷兵唔少，除咗羅賓奴之外，恩沙基長唞而伊巴謙莫域又有傷，好彩卡斯辛奴已正式加盟，佢喺前日呢場波首次助戰，狀態就麻麻，但穿起99號波衫（當年朗拿度着過）嘅佢功架肯定有，後日話唔定踢埋正選。