華叔獨步政壇近40年，先後創立教協、支聯會、港同盟同民主黨，通通係香港工運、社運同政治上最上乘嘅龍頭組織。華叔「武功」蓋世，但喺市面上就冇乜專門講佢老人家如何組織社運、從政心得嘅「秘笈」，似乎有啲可惜。好彩皇天不負有心人，八方早排終於搵到一本喺坊間失傳多年嘅「華叔傲訣」，內含華叔多年嚟理論、實踐心法。
呢本小書名為《司徒華思想萬歲》，封面紅地燙金，十足「紅寶書」，係由兩名前民主黨人合編，裏頭全部係華叔親口所講嘅金句，包含佢對搞組織、公民抗命、黨員修養、做人、寫文章等多方面嘅心得。呢本書仔其實係1996年華叔在民主黨第一屆黨校課程當中嘅講話，本來係黨中百厭人士惡搞之作，純粹內部流傳，屬無價非賣品。
出版社暫緩再版計劃
點知本書仔印好後，有一日無意中俾華叔知道，華叔睇完本書仔唔單止冇嬲，反而仲好認真咁親筆修改當中嘅錯誤，書仔在02年再版，不過都係非賣品，而且數量有限，八方幾經艱辛，先至班到一本返嚟，同大家一齊分享吓華叔語錄智慧。
八方聽聞，有出版社本來打算將呢本「紅寶書」再版，向華叔致敬，不過前日突然傳來華叔去世噩耗，出版社唔想喺呢個時候添煩添亂，所以暫緩出版計劃。
「華語錄」公開發售無期，八方排除萬難將精選內容曝光，跟華叔學嘢，有今生，冇來世。
mailto:[email protected]