做廠做咗成30年嘅香港工業總會主席孫啟烈，由當初要飲井水、瞓蚊帳床，要做埋「校長」提升工人質素；到跟台商、韓商鬥平搶爛市；家就面對部份香港政客「犧牲商界利益」搞福利主義，佢一一經歷過，依然企定定。佢話：「生意人有靈活性，識走位，唔會死嘅！」
了解內地暴發戶 因為窮過
中國改革開放30年，孫啟烈喺內地嘅廠房全程有參與，佢話歷盡當中嘅甜酸苦辣，乜都試過！佢仲好了解內地暴發戶嘅心理，因為「窮過！」
80年代啲工人驚死冇得食，一到食飯時間，個個好似走難咁搶食，完全冇紀律。內地文化質素低，工廠間中會有偷嘢、搶嘢發生，所以要建立制度，設罰則嚟規範佢哋，做廠要兼埋做「校長」。孫啟烈強調：「大部份港資企業有良心，對內地工人都好照顧，30年嚟內地文化受港資企業影響好大！」
雖然辛苦啲，但係80年代做生意易好多，佢話差唔多係獨市生意，只要勤力、掌握機會、有啲諗頭、價廉物美就得o架嘞。內地嘅土地同人工都好平，盈利可以高啲，「開廠都賺錢」，毛利可以高達3至4成。
歷30年變遷 唔想香港沉
經歷30年變遷，家競爭對手多咗好多，韓國、台灣同日本廠商都喺內地開廠，加上心雄，個個都擴大生產線「做大咗」，出現惡性割喉式競爭。家毛利有15%已經唔錯，扣埋一般開支有7至8%已經好理想，要靠科技含量增加利潤。至於現今嘅內地工人，佢話維權意識高咗，文化素質高咗，效率亦高咗。香港人以前每個鐘做100件，內地人只做得15件，家有過之而無不及。
雖然營商環境變差，成本急升，但商家有議價能力，最多「東家唔打打西家」，搵其他有投資機會嘅好地方，不過問心嗰句，佢話：「最唔想香港沉落去！」
講到呢度，孫啟烈憶述喺香港珠三角工商界聯合晚會上話：「身為港商，令我感到自豪！」佢解釋話，國家今日強盛，港商有好大功勞，有份促進粵港嘅經濟繁榮！
記者：周燕芬
華潤游說返大陸設廠
香港工業總會主席孫啟烈家族經營嘅建樂士，早喺1978年就返深圳設廠，都算係最早一批返大陸設廠嘅港資企業。原來當年佢哋係接受中央駐港國企華潤集團嘅邀請，返大陸做開荒牛。
身兼建樂士董事長嘅孫啟烈話，1976年大陸打倒四人幫之後，駐港嘅華潤公司就派代表同一批港商接觸，向佢哋推銷返大陸設廠，「打倒四人幫啦，內地有大量勞動力，協助港澳同胞解決生產問題！」由嗰時開始，中國已經急於搵外資，幫內地創造就業機會，為經濟注入生機。
講返孫啟烈家族經營嘅生意，80年代初期喺外國讀完書返嚟，將原來阿爸經營嘅五金塑膠廠，升級做生產不銹鋼廚具，仲自創品牌建樂士（Kinox），注重品質、設計時尚、「唔老土」，仲改咗個洋名，方便向外國客推銷，嗰時嚟講，超前人哋好多o架！
廠商轉型OSM求存
香港廠商面對內地嘅成本係咁升，經濟結構轉型，香港工業總會主席孫啟烈就話，大部份廠商會轉型，走類似利豐（494）嘅原策略性製造商（OriginalStrategyManufacturer，OSM）嘅路線。
所謂OSM，係將生產工序，外判畀珠三角以外嘅地區，甚至去到湖南、江西、四川等地嘅民企，將生產技術轉移畀佢哋，幫民企做大，因為民企「唔識英文，唔知規格」，做唔到外商嘅生意。
港商只係負責接外商定單，深圳東莞廠房就用嚟監管生產品質、檢查貨品、技術認證同負責整合物流付運。意味港商唔再負責生產勞工成本同原材料成本。
港商除咗走OSM嘅路線，亦都要走提升科技設計含量，以至自創品牌嘅「升級」路線，只有少數嘅企業選擇呢條路。孫啟烈解釋，投入研發工作需要好多嘅資源，唔係所有中小企有能力負擔，特區政府亦唔積極支持，只係研發成本10%有稅務優惠，同新加坡政府嘅研發費用3倍扣稅相差好遠！
爭取CEPA東盟商機
將生產基地轉移到偏遠城市嘅廠商只有少數，估計約10%，原因亦係涉及相當大嘅金額。
至於出口方面，廠商亦都面對挑戰。孫啟烈話，因為歐美市場萎縮緊，所以廠商會側重喺開拓內銷市場。
搵出路係港商嘅強項，孫啟烈話，東盟10國就商機處處。為此，工總家就爭取今年嘅CEPA（《內地與香港更緊密經貿關係安排》）補充協議當中，可以畀港商享受國家同東盟簽訂自由貿易協議內嘅條款，即係喺東盟區內嘅產品、原材料，以至半製成品貿易，都可以免稅。
後記：轉身要快
新一年，喺工業界出名有拼勁嘅孫啟烈大談逆境求生術。訪問期間，孫老闆叫港人最緊要轉身快，但佢老人家喺中港兩地打工仔加薪一事上，就窒步。
見慣世面嘅孫老闆，提到營商苦與樂嘅時候，就話香港通過最低工資立法之後，產生咗連鎖效應，原本時薪28蚊嘅工人都要求加薪，加埋廣東省醞釀畀打工仔參與協商加薪，佢慨嘆今日做老闆真係唔易。講吓講吓，孫老闆仲話覺得俾人蝦！
孫老闆喺內地打滾30年，係工業界嘅中國通，佢老人家應該好明白，打工仔無人工加，又點消費呢？講到呢度，孫老闆突然窒步，不過，佢都轉身夠快，既然營運成本貴咗，佢話無可避免要轉嫁畀消費者，一於「全民負擔」囉！