劉德華前晚元旦繼續喺紅館開騷，呢晚佢請咗林子祥（阿Lam）同吳君如做嘉賓，結果阿Lam喺台上追債，君如就索油飛擒大咬。君如一向talk得，又話晒都出過碟，梗係要開金口，之後仲要表演拿手好戲玩吹水。
被爆好慳家
甫出場君如已玩謝華仔話：「上年集郵女星搞到滿城風雨，真係好想當住萬二觀眾面前『集』你，今日仲好想摸吓你嗰六嚿腹肌。」華仔惟有當眾就範，俾君如飽嚐「獸慾」，之後君如笑住講：「你啲飛真係好難買，梗係要打畀你啦。我老竇可唔可以長命百歲都要靠你，鬼叫佢識好多醫生朋友，佢哋個個搵我幫手撲飛，仲有我細佬個老細，佢有冇升職加薪都睇呢鋪。」
君如越講越興起，又爆華仔夠慳家：「明星中你都係最慳，我未見過有咁紅嘅明星，只得一個助手、一架車、只係住千幾呎嘅屋。話時話其實你留啲錢做乜？係咪留晒畀麥當勞之家？不如留啲畀我，我想『集』埋你副身家！」
林子祥追債
之後到林子祥出場，佢話：「82年我哋喺海南島拍戲，我就叫佢不如試吓唱歌，當時華仔仲話如果佢得，就搵一蚊畀四毫我。華仔家做咗咁多年歌星，欠我咁多，條數襟計囉。」華仔聞言搞笑話：「係咩？我有咁講？咁以後我唱歌賺到啲錢，40蚊畀Deannie姐（葉德嫻），40蚊畀你，20蚊留畀屋企。」