港股在2010年埋單升5.3%，全年有波幅冇升幅。
新一年市場焦點有三：一係中國經濟增長、通脹同埋利率政策，二係花旗嘅QE政策對股市同全球經濟嘅影響，三係歐洲債務危機嘅發展。至於資產市場，花旗股市普遍被看好，對港股有直接影響。喺通脹預期加劇嘅背景下，黃金、白銀、石油嘅對冲同炒賣活動會增加，通脹預期亦會刺激物業投資同埋增加消費嘅意欲，跟住呢啲脈絡揀投資產品同制訂策略，贏面會高好多。
農行C輪24499：農業銀行（1288）上日報收3.90元，升1%。股價近日由低位反彈，逐步貼近3.95元阻力位，破位可進一步上試4.03至4.13元，短炒一轉可以諗吓隻C輪24499。
隻輪現價24.9仙，2011年2月28日到期，行使價3.78元，溢價3.3%，引伸波幅29.3%，槓桿率15.7倍（有效9.8倍），正股升上4.13元，24499睇41.4仙，升幅66%，正股跌穿3.80元就沽咗隻輪。
俊樺