近年唱片市道不濟，加上樂壇不團結，唱片公司杯葛電子傳媒之聲不絕，又有五大唱片與無綫反面，令樂壇一片混亂，歌手們雪上加霜。不過樂壇這境況卻絕不影響頒獎禮常客陳奕迅（Eason），實力非凡的他可說是樂壇的奇葩，唱片、演唱會一出例必賣個滿堂紅，最近他舉行的世界巡迴演唱會又賺大錢，令不少唱片公司睇中這個即將約滿環球的吸金王，除環球打友情牌力挽Eason續約外，據知bma、東亞、英皇、華納及Neway都對他虎視眈眈，六大唱片勢掀起一場爭奪戰。
現年36歲的陳奕迅已是頒獎禮的常客，前晚於灣仔會展舉行的「叱咤樂壇流行榜頒獎典禮」，他一人獨攬五獎成為大贏家。即將約滿環球的Eason可說是近年樂壇的奇葩，無論唱片還是演唱會都例必賣個滿堂紅，更擁有台灣、內地等龐大市場，所以他約滿環球的消息甫傳出，頓時成為各大唱片公司的爭奪對象，bma、東亞、英皇、華納及Neway，都有興趣以高價力招Eason加盟。
與環球餘兩唱片約
前晚Eason於叱咤慶功宴上強調與環球仍有合約，他說：「我同環球同經理人都合作得好開心，佢哋將我嘅事業推向更高嘅層次。」問到好友楊千嬅有否拉攏他重回華星大家庭時，Eason說：「我同佢好少講公事，睇吓點啦，我真係唔諗呢啲住，我冇同任何人傾合約，我家最關心係台灣演唱會。」
記者指Eason簽約華星是好事，他說：「不如全個華星嘅師兄弟妹一齊開騷我仲開心，合約嘅事要時間考慮，而且合約好私人，係終身大事。上次都係自己衰多口，求其噏，搞到好多謠言。」
Eason又借機會多謝所有對他有興趣的唱片公司，他笑笑口說：「好多謝大家之前講嘅羅生（bma老闆羅傑承）、林生（東亞老闆林建岳）同薛生（Neway老闆薛嘉麟）。」對於成為樂壇搶手貨，Eason即反問為何不將Sony和華納加入戰團，他笑稱最好全港唱片公司都力爭他過檔，舊公司英皇也無任歡迎，他坦言與楊受成私底下是好朋友。Eason表示與環球仍有兩張唱片合約，他說：「我嚟緊仲有一張國語碟，2月又出一張。」
對於是否有意斟Eason過檔，bma老闆羅傑承透過唱片公司發言人表示：「公司對所有有實力嘅歌手都有興趣，家都要了解Eason嘅合約到幾時，同埋佢嘅發展去向，我哋唔排除會同佢傾，但暫時未有接觸。」
bma斟李克勤過檔
華納發言人指公司對有潛質歌手都感興趣，但不便透露是否有聯絡Eason。據知李克勤也即將約滿環球，bma亦已開始斟克勤過檔。
東亞被傳以億元計搶奪Eason，記者昨日向東亞高層陳志光求證，他說：「我哋公司對所有才華嘅歌星都有興趣傾，但係咪用銀彈政策，我諗主要都係睇歌星本身嘅價值去訂價碼。」面對多間唱片公司欲撬Eason過檔，環球負責人黃劍濤表示：「喺好幾個月前已經同Eason經理人傾緊續約嘅事，我哋已經開咗個價畀佢哋，家只係等緊佢答覆。公司對佢續約都有信心嘅，雖然話有啲公司出高價撬人，但我諗佢哋唔會睇錢，都會好全面咁考慮，公司同佢合作咁多年，佢可以睇到公司點幫佢嘅。」
Eason成為搶手貨，問其經理人陳家瑛選擇與哪一間唱片公司合作？她說：「多謝各界畀面，呢段時間同Eason會好好傾吓未來方向，呢段時間太敏感，所以都唔係咁方便講咁多，等遲吓有結果會話畀大家知。」
張敬軒盼Eason留低
有傳因Eason扭計不續約，環球就改捧張敬軒爭叱咤男歌手金獎，但前晚金獎仍落入Eason手中。軒仔前晚開腔表示想Eason留低，他說：「我續約環球都係因為有Eason、克勤同校長（譚詠麟），演出機會都大啲。」記者建議他過檔其他唱片公司即有機會做一哥，軒仔笑言：「如果對落冇人，一哥同細佬都係自己。」而得到叱咤男歌手銅獎的古巨基對Eason以續約換金獎的傳言，他認為是娛樂新聞一則，並說：「娛樂新聞係娛樂讀者，我唔係當事人無謂講太多，傳聞呢啲心中有數，幾多真幾多假。」此外，容祖兒表示渴望得到我最喜愛的女歌手獎，她說：「我同呢個獎一向無緣，我好想喺林海峰手上拎呢個獎。」
採訪：王連連、胡比、李珮洳
攝影：陳慧安、陳俊強