首先，大家唔使猶豫，呢個係真的盧覓雪，並非阮兆祥假扮。今次跟Michelle去馬來西亞，目標清晰，就係要橫掃大馬各間隱世美食店！第一站係吉隆坡，GoGoGo！
記者、攝影：蕭漢祥
鳴謝：馬來西亞旅遊促進局（香港分局）、馬航假期、恆利旅運、NovotelKualaLumpurCityCentre
廚師做到爆衫都懶理
一早知盧覓雪識搵食，唔止喺香港，連台灣都瞭如指掌，不過Michelle今次卻帶路往馬來西亞搵食：「我有個馬來西亞朋友住在香港，時常介紹一些當地的特別餐廳。」原來有高人教路，難怪今次到訪的餐廳，並非喺吉隆坡市中心，而在西南面的PetalingJaya，呢一帶無高樓大廈，全部係兩三層樓房，好新界隱世feel。但就係這種環境，潛藏了很多又平又抵食的食肆。
有幾隱世？呢家「啦啦昌」內裏一大片爛地做停車場，單睇畫面以為去咗落馬洲。呢個格局咪以為佢會好「流」，啦啦昌的啦啦真係好味，咩「啦啦」？馬拉話的啦啦即是花甲，老闆叫阿昌，順理成章叫啦啦昌。Michelle大讚招牌花雕酒煮花甲：「濃烈的花雕酒汁底完全帶出花甲的鮮味，肉質又爽甜。」此刻啦啦昌從後跳出來，解畫：「汁底和花甲一齊煮，花雕酒只係放碟，花甲上碟時汁底撞花雕酒，咁就可以保留酒香，引晒花甲啲鮮味出來！」啦啦昌就憑呢一招，俘虜Michelle和萬千食客的心，繁忙時間全場八十張枱爆滿，花甲來貨近100公斤都日日清。
深入廚房重地，全場近30位廚師忙到甩轆，燒魚師傅燒到爆衫都唔理，熱辣辣當通風系統，咁熱皆因佢不停製作炭燒非洲魚，一日都要燒約50條魚。啦啦昌解說非洲魚製法，將魚去除內臟，兩面魚身大量撒鹽，放在炭爐每5分鐘翻身燒熟，20分鐘就搞掂。製成品外表雖有點dry，但入口不止唔乾身，仲好有魚鮮味，味道遠勝於賣相。
a.LaLaChongSeafoodRestaurant
地址：Lot13556,JlnCempaka,KayuAraDamansara,PetalingJaya
彭門女將肥佬蟹 日賣300斤
Michelle今次旅程同時為TVB拍攝飲食節目《覓食四方》做主持，全部食肆都由她親自欽點。不過小記懷疑，Michelle係咪特別偏好食海鮮，因為她另一間推介都係海鮮。這家肥佬蟹海鮮樓，招牌菜有椒鹽蝦、清蒸蝦、潮州紅魚，還有主打酸辣蟹。大馬餐館大都有秘製醬汁，雖然多番追問老闆都唔肯講醬汁點秘製，但入口味帶鹹、酸、辣，就算不斷食蟹都唔覺滯。彭氏二家姐仲推介用烘乾多士點蟹汁，惹味到暈！肥佬蟹的賣蟹紀錄，周末可日賣300斤，強！
店內打骰的清一色彭氏女將，何來肥佬呢？她們解釋這店於40年前由父親開業，由於爸爸身形肥胖，所以取店名「肥佬蟹」。整蝦同樣拿手，彭嫂一蝦整兩味，香煎蝦用薑絲、麻油、蒜茸、辣椒仔，先爆香再落生抽炸熟，非常惹味；清蒸蝦則用上秘製辣醬、蒜茸蒸煮，味道清新。兩道菜好似孖生兄弟但性格極端，一個野性難馴，一個溫文爾雅。
b.肥佬蟹海鮮樓
地址：No.2,JalanSS24/13,TamanMegah,PetalingJaya
即煮咖喱麪 辣到差啲頂唔順
Michelle話，馬來西亞最出名的食品，離不開椰醬飯、肉骨茶、喇沙等。於是她又帶我們到一家從檳城百年路起家，到現在已有三間分店的地道餐廳，她最欣賞其招牌咖喱麪，辣味能做到嗜辣朋友最愛的感覺，就係辣到將近忍受唔到，但又好想繼續食落去，辣得過癮！見Michelle食得咁enjoy，當然要叫番碗試試，不過一叫就等咗十幾分鐘，老闆梅先生話係因為每碗都要即叫即煮，保證熱辣辣上枱，咖喱麪配料有鮮蝦、魷魚、螄蚶，碗仔細細但非常足料。這裏還有炒貴刁、秘醬腸粉、烏達魚等，樣樣都味道唔錯，但一日走幾場拍攝，場場都大魚大肉，真係飽到頂住食唔落，結論係……食家唔易做！
c.百年路
地址：56,JalanSS2/66,PetalingJaya
TastesinKL
溫馨提示：去大馬搵食，第一樣先要識搵路，唔止喺Google地圖未必搵到準確位置，就算有地址，好多路牌都貼晒廣告，想搵都好難。
TravelMemo
持特區護照或BNO免簽證。馬來西亞領事館：
28210800
馬來西亞吉隆坡三日兩夜之旅，包馬航來回機票及入住吉隆坡Novotel酒店，每人由$2,570起。馬航假期： http://www.masholidays.com.hk
1馬幣約兌2.5港元（文中價錢已折算港元）
240V，三扁腳插座
馬來西亞
吉隆坡
下周有雷暴，23-32℃
