踏入2011年，大家首先要面對嘅就係一個「加」字，交通費加、電費加，仲有就係銀行嘅服務收費。慳妹元旦日email咗滙豐銀行嘅服務收費簡介畀敏妮，諗住都唔慌好嘢，梗係又加價，點知電郵話，獅子銀行人民幣現鈔存款豁免收費。
「加息搶客」戰隨時爆發
敏妮第一個反應係，呢間「香港人嘅銀行」都算冇辜負香港人對佢嘅一片忠心。不過，諗深一層，獅子銀行咁做，可能只係一個雙贏嘅做法，唔算係益香港人。記得喺聖誕前，中央向特區政府派禮物，加大支持本港人民幣市場發展，反映企業貿易對人民幣需求越嚟越大。
銀行界要配合企業客戶，本身就要有番咁上下人民幣資產，對於銀行界嚟講，存款係吸納人民幣最便宜嘅方法，所以你將人民幣「送入」獅子口，佢同你講多謝都嚟唔切，仲收你服務費？
其實之前中銀、永亨同大新銀行，都已經推出人民幣定期存款息率優惠，唔單止提高定存息率，仲降低入場門檻，等多啲客存人民幣喺佢哋銀行。
相信銀行界對人民幣嘅需求會越嚟越大，除咗豁免存入現鈔服務費，嚟緊分分鐘會爆發「加息搶客」戰。敏妮唔係幫獅子行倒米，只係覺得單單豁免存入現鈔嘅服務費，好似未夠吸引。
另一方面，既然預計銀行住大家手中嘅人民幣，有心做人民幣存款，就唔好為咗貪高息，做長年期定存，以免呢頭做咗，嗰頭發現另一間銀行嘅優惠仲吸引，走寶！
溫敏妮
http://wanmanli.com/blogs/