演藝學院畢業後，蘇玉華加入了香港話劇團，因為演出《我和春天有個約會》鳳萍角色而備受注目，獲邀加盟無綫旗下。阿蘇說：「最先我哋係做舞台劇，後來高志森拍成電影版，由初初影藝一間戲院做，跟住越嚟越多間，越做越爆（這部低成本製作於94年上映142日，票房高達2141萬），從而有人認識。不過，喺之前我做舞台版時，TVB藝員科嘅人嚟睇，睇完好鍾意，就搵咗我同謝君豪去試鏡。」
人工奀難生存
由舞台跳到電視螢光幕，阿蘇其實幾經掙扎。「因為當時我喺香港話劇團最當紮，老闆好錫我，係好有前途一份工，可能會成為女主角，掙扎係因為TVB人工好奀，係我香港話劇團三分一，好恐怖，份人工真係生存唔到，但後生想試多啲唔同嘢。始終舞台劇觀眾好少，做一個戲可能得幾千觀眾，但電視係講緊百幾、幾百萬人，影響力好大。雖然頭幾年捱得好辛苦，但睇番轉頭，自己選擇係啱嘅。」
所謂辛苦，不止是入不敷支，而是體力和精神嚴重透支。「我試過攞住叠通告喊出嚟，三個劇一齊開，攰到等埋位企喺度瞓着，又試過拍完通宵之後返屋企冲凉後瞓15分鐘，跟住起身又再開工。嗰陣時三個劇叠住忙到冇期拍，TVB惟有整死我，好似《刑事偵緝檔案Ⅱ》第10集已經死咗，《真情》又要死，嗰陣時啲劇真係冇乜好下場。」
拍劇鍛煉鬥志
然而，這種非人生活對阿蘇而言是鍛煉，令她變得更堅強。「好在情況好快改變，當多人認同你做嘅戲，對你係多咗份尊重，覺得呢啲人係有追求，唔係呃飯食，捱咗三年之後都好順利，得到好多好角色，基本上喺TVB我係好快樂。」