尖沙嘴諾士佛臺素有「九龍蘭桂坊」之稱，中環蘭桂坊之父是盛智文，九龍蘭桂坊一姐則有周驪莉──景樂集團行政總裁。在諾士佛臺經營8間食肆，只為延續已去世兄長的心血，臨危受命，周驪莉說：「我自信心爆棚。只要你肯去發掘、研究，唔會唔成功。」
記者：陳皓怡 攝影：梁鑑章、羅君豪
一切要由金巴利道鸚鵡吧說起。周驪莉兄長周家而91年在金巴利道開設鸚鵡吧，飲酒之餘可玩骰盅，為市場受落，「我記得哥哥話我知，整個尖沙嘴佢間bar係最旺嘅一間、最賺錢嘅一間。」金巴利道的酒吧變得成行成市，為免競爭，加上家族一直經營高級西餐廳，所以周氏兄妹在尖沙嘴另覓「藍海」，找到諾士佛臺。
92年兄妹倆走上諾士佛臺，「當時整條街冇餐廳，只係得一、兩間老式酒吧，我哋覺得條街靜中帶旺，自成一角，相對金巴利道，呢度租金又平啲，於是揀咗喺呢度開設一間西班牙餐廳。」這是諾士佛臺故事的開始。
打造諾士佛臺，不能只得一家西班牙餐廳，「做生意要成行成市。吸引多啲人流，要畀多啲選擇。」於是在2000年，兩兄妹在諾士佛臺一幢大廈的4個舖位，同時開設泰國菜館、法國蠔吧、俄羅斯餐廳及酒吧HavanaClub，頓時令這地方熱鬧起來。
把握2000年市道低落時逆市擴張，迎接旺市來臨，但「2000年我哋開咗8間舖，諾士佛臺4間，其他出面又開4間，都係我哥哥開嘅，開完呢8家舖佢就『走』咗，因為太辛苦喇！」
不開酒吧 繼續賣酒
哥哥走了，生意繼續。先天條件局限，「諾士佛臺冇晏晝，夜晚亦冇去到蘭桂坊咁夜，只去到一點鐘左右，蘭桂坊可以去到兩、三點。」只有夜市，所以即使不開酒吧，但不能不賣酒，「夜一定要有酒。只係飲咖啡賣唔到好多錢，賣杯咖啡廿幾蚊，賣杯酒40幾蚊。」不過，有酒就容易令環境變得複雜，「其實我開咗咁耐，係最近先變得複雜，我喺度15年都唔複雜，因為上嚟嘅人都係有品味，成熟嘅客，上嚟係享受、聽音樂、飲wine。」
要怎樣的客，其實一早已在盤算中，「做生意一定要定位，你想要乜嘢客。」如何定位？「假如有個舖位喺旺角，人流較雜嘅地方，唔啱我，我連睇都唔會去睇。假如位置啱我嘅客路，我就要定，我要乜嘢客？唔可以話今日想要OL、executive，聽日冇生意就想要細路仔，咁唔得。」周驪莉揀了20至40歲中產階層，「佢哋frequencydining，唔喺屋企煮飯，經常有朋友約食飯。Frequencydining客唔可以太貴，當佢搵2、3萬蚊個月，唔可以餐餐食1000蚊，所以圍繞二、三百蚊。」
做生意要有個心
都怪後來的經營者擾亂了原來生態。2010年8月18日，諾士佛臺發生致命兇案。周驪莉說，「斯文啲嘅客驚咗唔敢上嚟，以為你呢度雜咗，影響咗差唔多4個月。」加上附近TheOne、K11、iSquare的出現，諾士佛臺迎來巨大挑戰，「慢慢做囉！」這個聖誕，她與旅遊發展局合作，為諾士佛臺增添氣氛，「往年冇o架，條街啲人唔肯做嘢。我成日覺得做生意，真係要有個心。」
求生，唯一可以靠的是自己。開一家新店舖，2至3年便要達收支平衡，「你要做到，點都要諗掂佢，唔可以靠等。你一定要去學點樣求存，求生存。」周驪莉堅定的說。
景樂集團發展史
1991 周驪莉兄長周家而創立鸚鵡吧
1992 在諾士佛臺開設西班牙餐廳ELCID
1993 景樂集團正式成立
2000 周家而心臟病去世
2001 增設中菜，開設天與地
畀得起租仍然要走
周：周驪莉 記：記者
在香港開舖做生意，最難捱是租金。
記：可有想過自置物業？
周：以前買過，好價時賣了出去，但家仲好價。
記：可有再買回來的打算？
周：再買返又太貴，講緊係6倍嘅嘢。1994、95年到家，升咗6倍。不過冇問題，畀得起租，呢度一間舖十幾廿萬租。
問題是，有些地方，畀得起租，仍然要走！
周：太古嘅又一城，唯一一間我喺業主嗰度喊。開舖時係1997年，股票跌，嘭一聲整個香港冧，嗰時租咗又一城啲人走晒，係得我兩間舖開。6年之後，太古換人，佢就要你走。嗰時心生不忿，冇人同你開時我都同你開，到個場旺咗你就趕我走？當時係覺得可惜，覺得業主係冷酷。
令周驪莉逼得在業主面前落淚，還有一個原因。
周：係我同哥哥相處最耐時間嘅一間餐廳，因為唔夠夥計。嗰時股票冧，冇生意，所以冇請人，只請7、8個人做住先，等人流多先請人，點知一開門做生意原來咁爆棚，所以日日都唔夠人，嗰陣同哥哥嘅關係好密切。
為開舖 日抬20斤魚
「求存」是周驪莉開舖最起碼要求，「我個人鍥而不捨，成日覺得冇乜嘢係唔得。」開西班牙餐廳，缺人才、亦欠食材。
香港找不到西班牙廚師，周驪莉想到叩領事館門，「佢哋介紹咗位西班牙太太畀我認識，呢位太太鍾意煮嘢。」為了認識正宗西班牙菜，她與廚師去了4次西班牙。香港找不到西班牙食材，周驪莉每天逐個街市找。為找適合入餚的鱸魚，「嗰陣無從入手，盲舂舂，灣仔又去，得兩條，就買嗰兩條，佐敦又搵兩條，抬返嚟畀師傅整餸，日日抬起碼20斤魚返嚟。」
OK啦=唔好
要留住客人的心，必先留住客人的肚。「我成日問夥計，呢樣嘢好唔好食，佢哋可能會答OK啦。喺我字典裏面『OK啦』係唔好，OK係好過冇。」即使經濟低迷，周驪莉亦不允許食物水準下降，「好似沙士期間啲人賣平嘢、割價，或者將貨就價。如果呢個時間畀一啲次啲嘢畀人，啲人對你更加冇信心。其實香港人唔係冇錢，只係值唔值得使呢啲錢。」
忙到唔夠膽返工
景樂集團一向經營高級西餐廳（FineDining），但廚師卻以本地人為主，原因不是工資較便宜，只是「香港人係比較靈活一點。」周驪莉指，若在香港開西餐廳，尤其充滿地方特色的餐廳，必須融入本地人口味，但外國廚師較固執，「佢會答：『西班牙係咁！』」相反香港人較優勝，「如果將香港人擺喺西班牙學，學完返嚟佢變化得仲大。」
西餐廳唔請西廚
開新疆餐廳時，她安排廚師在新疆學廚兩個月，「要培育一個人，都係要擺少少錢落去。」唔驚過橋抽板？「咁都冇辦法。」
不過「請唔到人」仍是問題。周驪莉慨嘆這十多年請人變化很大，「以前登報紙，啲人排隊嚟見工，家登一星期，可能得兩三個，見5個可能得1個。」她願意請新人，但做食肆始終辛苦，「有個夥計，插條匙喺locker第二日唔夠膽返工，忙到驚。」
後記
Anna姐：我唔想做女強人
以「女強人」來形容周驪莉，她說：「我唔想做女強人，我只係做自己鍾意嘅嘢，女強人係做唔到你鍾意啲嘢。」
訪問當天，諾士佛臺各餐廳正籌備情人節菜式，跟着她在小街上游走，只聽到「Anna姐」之聲不絕，下屬都在問她意見，待她發施號令。她一切彷彿盡在掌握，一邊回應小記提問，一邊擺一擺碟，露出滿意表情。訪問完畢，小記不禁也叫了她一聲Anna姐！
