呢期碟界俾演唱會搶盡風頭！繼上星期千嬅同阿倫Blu-ray後，本周輪到黎生愛將衞蘭！講花邊新聞同資歷，佢當然無兩位前輩咁堅，但筆者發現，Blu-ray賣街首日竟然有舖頭話無晒貨！主因之一，懷疑藍光版支援DolbyTrueHD7.1，比平日所見嘅5.1仲多咗兩條Channel，即係幾環迴？最好自己感受囉！
記者：陳國輝
快歌環迴最靚聲
想屋企變到好似紅館咁，唔係無可能！如果你只係買12月頭出嗰隻《衞蘭FAIRYConcert2010》DVD，頂多只有5.1聲道，而Blu-ray版就唔同，佢提升為全高清DolbyTrueHD7.1之外，更支援未經壓縮嘅UncompressedPCMStereo，歌聲更甜之餘，環迴感也更加逼真，而個人就最鍾意聽快歌嘅《ChocolateIce》，Surround夠勁，低頻亦唔差，後面仲有多位靚女Dancer性感表演，整體觀感效果唔錯！
全碟長達兩個幾鐘，衞蘭把聲一直Keep住唔走樣，已經相當難得；不過你認為乜缺點都無？又唔係喎！最礙眼亦都係最吸引嗰部份，揀7.1聲道Menu內，竟然無大部份演唱會Blu-ray必備嘅卡拉OK功能，得兩種音效選擇實在太少；但最奇怪係，Menu入面竟然無字幕選擇，對似我一樣連本地製作節目都要睇字幕嘅觀眾，感覺會有啲唔慣囉！
黑衫黑景層次弱
至於視覺效果方面，好老實，真係差強人意！影碟內已甚少精心設計嘅佈景，就連服飾種類都唔多，但最弊係選擇衣着上，竟然多次出現「黑衣套裝」，加上喺處理環境以及服飾方面均欠鮮明同層次，所以睇落去黑畫面所佔比例甚多。
除咗呢個問題，現場燈光效果亦唔算理想，例如當李治廷出場彈結他Solo嗰陣，佢大部份時間都係玩「黑面」；但到咗演唱會尾聲，「燈神」又突現返嚟，畫面當堂清楚靚仔晒，只可以講，整體視覺上唔算差，但表現好飄忽不定。
Profile
類型：Blu-ray
畫面：1080p
聲效：DolbyTrueHD7.1/PCM
同場加映
《東風破》睇舊香港
數到今個禮拜新片，港產就得一隻《東風破》。呢套片屬小品式製作，主角有官恩娜、周浚偉以及泰迪羅賓等，故事講一名濫藥少女、舊金山女中醫，以及義莊阿伯三人，他們遇上後所發生嘅奇妙事情，並且相互之間，為對方化解戾氣，帶出人間有情道理。
