此蘇不同彼蘇，但一樣「good騷」。蘇玉華近日挾美女廚神之名為無綫主持《和味蘇》，以跟寸爆蘇施黃相反的親民表現贏得口碑和收視。與一般飲食節目不同，阿蘇的節目着重人性，所以她會到監獄煮餸送暖，又訪巴基斯坦人和尼泊爾人的家做文化交流。提到精湛的烹飪技術，被視為食家兼廚神的阿蘇卻自我踢爆說：「其實裏面有啲演技喺度，我係一個專業嘅演員。」 撰文：戴彩煥
演戲跟烹飪，看似風馬牛不相及，但兩者其實有很多共通點。被觀眾視為美女廚神的蘇玉華，原來也是從演戲中領悟出一番道理。阿蘇日前說：「每個廚師有自己廚房，廚房有乜嘢食材、廚具係點？點樣去煮？佢哋都有自己一套方法，當佢煮道菜出嚟，我根本唔知道佢喺廚房搞乜嘢，只知道個菜好唔好味。同演員一樣，每個演員有唔同氣質、樣貌、眼神同身體語言，監製畀個角色佢，佢就用佢功夫去鑽研、去演繹，佢點處理個角色我哋唔知，只知佢演出好唔好。演員同廚師其實好似，呢樣嘢係06年一個外籍老師嚟香港教演戲時講，我都係第一次聽到呢個比喻，覺得好有道理。」老師一席話恍如明燈，讓阿蘇開始嘗試將演戲心得融入烹飪中，從觀察、探索、了解到實習，阿蘇始發覺煮食原來跟演戲一樣樂趣無窮。
精湛廚藝包含演技
觀眾眼中，阿蘇是食神也是廚神，但今天她卻要告訴大家，她看似精湛的廚藝當中，其實包含了演技。阿蘇：「裏面有啲演技喺度，我切親隻手，整跌隻鑊蓋，有冇畀你睇到？但我好知點樣去演，正如有啲女仔表演到好騰雞一樣，當然我唔係完全唔識，但同真真正正專業廚師比較，真係差好遠，我只係業餘，冇學過！所以人哋叫我廚神，我好怕，我對自己要求好高，完全唔覺得自己係叻。我同渣嘅人比咪叻囉，但要做到幟哥（龍皇海鮮酒家老闆黃永幟）咁叻就冇可能。食家同廚師我都唔係，但我係一個專業嘅演員。我對好多嘢都有好奇心、肯去學，正如呢個餸係點整出嚟？正如個角色點可以做得好啲？我求知慾係好強。」
烹飪要不停去試味，才試出好味道，正如演戲，要不斷摸索、不斷嘗試。「你試第一碟以為好好味，但當你試多幾碟之後，就會發覺嗰碟其實好普通，你要不斷提升自己審美眼光，正如自己睇戲越嚟越腌尖，食嘢越嚟越嘴刁一樣。」
接戲方面，要否越來越腌尖？尤其去年阿蘇在美國進修演藝課程整整一年，面對不時被批評質素每況愈下的港劇，會否「揀唔落手」？阿蘇笑說：「嘩！好尖銳！其實TVB《依家有喜》有搵我傾過，但佢哋要做到2月，而嚟緊我香港藝術節有演出，係時間問題做唔到啫。」
今次答應主持《和味蘇》，阿蘇向無綫開出條件，就是要做一個不一樣的飲食節目。為了自己這個第一次，阿蘇自己去做資料搜集，設計每集內容，之後再將構思向監製建議。
食物為橋發掘人性
阿蘇說：「坊間太多飲食節目，一大班人去食嘢，講吓嗰樣係乜嘢，對我嚟講好悶、好夠，所以TVB接觸我，我講明唔係淨係做呢樣嘢。對我嚟講，食物只係一種橋樑，人先至係最緊要，自己最感興趣係人性，究竟食物可以帶出乜嘢故事，拉近人同人之間距離？所以我講環保講有機耕種、去巴基斯坦人同尼泊爾人屋企煮食，做文化交流，亦有去監獄同大家一齊煮，請埋佢哋屋企人嚟，等佢哋喺監獄可以同屋企人做冬，咁食物就會變得更有意義，唔係淨係一味推介。今次對TVB嚟講係一個進步，因為佢哋為保住收視好容易墨守成規，但今次佢哋竟然fullysupport！真係好開心。」
所謂知己知彼，問有否看過黃麗梅等主持的飲食節目時，阿蘇坦言：「冇睇，我淨係睇明珠台，睇JamieOliver同NigellaLawson，已經學到好多啦。」
服裝：ckCalvinKlein
場地：銅鑼灣EICID
髮型：RentonHung@ViailColpo