「千億新抱」徐子淇自06年結婚後，三年抱兩，為恒基李家連生兩個囡囡晞彤及晞兒。老爺四叔李兆基因抱男孫心急而多次催生，大伯李家傑去年在美國找代母誕下三胞胎男嬰，徐子淇雖然口口聲聲表示冇晒壓力，但她上月穿着特製的立體晚裝，即時惹來大肚疑雲，更傳懷上孖仔。
不出所料，徐子淇果然又有喜，前晚恒基贊助除夕煙花，四叔在中環上船前，親口承認徐子淇懷有第三胎，更謂如果再生女，他會好失望，可以想像子淇和老公李家誠追仔壓力非常大，他們夫婦前晚未有同行。
夫妻不出門
四叔前晚十一時多，去到文化中心對開的觀景台，他由女兒、女婿、外孫等陪伴，天寒地凍，在戶外吹了近一小時風才離開，四叔離開時，市民歡呼聲比對曾特首離場更熱烈！他說：「子淇有啲感冒，所以唔嚟。」新年願望可想要抱多個男孫？他聞言眉開眼笑說：「好呀！好呀！」問他新抱是否陀孖仔，四叔就說：「係咪孖胎就唔知，有咗就真嘅，好啦，冇乜特別！」快將又添乖孫的四叔心情靚絕，在碼頭搭住女兒、外孫女等傾偈。
採訪、攝影：藍文浩