由周秀娜（Chrissie）同浸大咪神楊梓瑤（Carol）擔大旗嘅新戲《婚前試愛》，成為唯一一部港產電影喺聖誕檔上映，對撼大大細細嘅外國電影，結果上映一個禮拜票房有500幾萬，相當唔錯，前晚台前幕後喺尖沙嘴慶功開心吓，Chrissie同Carol都有出席，可惜天氣凍，兩位咪神封胸出席，不過Carol就跌吓膊露咗少少肉。
喺屋企唔戴Bra
講到戲中有一場講Carol喺屋企着住運動裝嘅戲，有觀眾話佢好似飛釘凸點，Carol話：「我貼咗乳貼做晒安全措施，應該唔會，我自己喺屋企都唔會戴bra，瞓覺又點會戴bra。我有貼乳貼，應該係燈光問題。」Carol希望大家唔好成日focus佢嘅身材，佢話咁樣蹧蹋咗部戲。講到性感底線？Carol話：「大露背都係極限。」問佢係咪以後唔着三點式？佢又轉口風話睇情況而定。至於Carol當晚咁密實，萬一Chrissie着到好性感咪輸蝕？Carol賣口乖話：「佢先係第一女主角，我係小小後輩，讓吓前輩冇所謂。」
Chrissie聽到Carol叫佢前輩即話：「我幾時升呢咁快，唔敢當，我自己都仲有好多嘢要學，我唔敢教人哋任何嘢，自己都仲係新牌仔。」