2011旅遊預言　最好去邊？

HappyNewYear！新一年新開始，諗諗今年飛邊度好，例牌翻開《LonelyPlanet'sBestinTravel2011》，也一如以往：「唔係好啱使喎！」自求多福，香港人理應有自己的2011'sBestTravel。

記者：曾冠輝
部份圖片：陳慧敏

民國百年　港人大熱依然台灣

LonelyPlanet十大始終係畀鬼佬睇多，參考可以，但未必啱聽，都係問番香港代表好啲。東瀛遊執行董事禤國全先生：「由去年10月開始，日圓、韓圜甚至泰銖都貴咗唔少。預計2011第一二季度旅遊市道會輕微下跌約15%。但這時間去旅行團費會抵啲！」咁去邊好呢？「今年大熱該係台灣，一來因為貨幣變動較小；二來有台北花博；三來台灣積極推動旅遊，家連入台證都唔使，更加方便。」仲有！2011正是民國100年，預計全台都將有連串慶祝活動，如苗栗每年一度的燈會便以民國百年為主題。觀光協會亦舉行「旅行台灣．感動100」的推廣活動，其中之一是旅客可憑機票證明於台灣觀光協會香港辦事處領取台灣夜市消費券，仲唔乘機掃食全台各大夜市？
台灣以外，禤生心中黑馬為俄羅斯：「2010年國泰和香港航空分別新增了直航莫斯科服務，今年夏天預計會多咗唔少香港人前往俄羅斯旅行」，有直航，順路再去東歐行吓，又是條新興旅遊路線。

台灣觀光協會網址： http://www.taiwan.net.tw

2012末日自救預言

趁歐元有排都未升得番之際遊歐洲當然是好選擇。但另類點，揀巴西吧！你不見在2011寂寞的行星位列第二嗎？當地為打造2014世界盃，定必落力打造國際形象，整頓治安，再作基建。卡塔爾航空還開通了經多哈轉飛聖保羅航線，免除經美國過境被人審犯。2月仲可趕及參加里約熱內盧一年一度的巴西嘉年華，感受森巴熱情。仲有！2012末日預言你都聽過，預言出自發源自墨西哥的古瑪雅文明，指出地球每3,740年便會因太陽磁極對調而被毀滅一次，下次正是2012！還不快去墨西哥金字塔睇睇，參透自救之法。

■墨西哥金字塔：墨西哥奇琴伊察金字塔是瑪雅古文明的後遺，被視為眾神居住的地方。

寂寞十大之首：Albania

年尾或年頭總係多十大，寂寞的行星也一樣，每到年底都有一本《BestinTravel20xx》上架，內裏仲有三個十大：Top10Countries、Top10Regions、Top10Cities，推出大堆理由話你知2011最好去邊。本年十大「besttravel」國家位列首席者，你點都估唔到，竟然係阿爾巴尼亞（Albania）！這個名字似中東，實際在歐洲巴爾幹半島的國家，位處希臘西北隔籬。從前固然是政治紛爭與戰火交加的地方，只有「Bravestofthebrave」的背囊友先至夠膽去。到九十年代開始陸續多人涉足（不過依然是小眾），她的「媚」，卻只有耳語相傳。睇睇地圖，阿爾巴尼亞算是個地中海國家呀，自然有一排清澈、湛藍夾雜碧綠的海灘，同希臘絕對有得fight！但此處勝在人少，講出嚟話自己去過，已是虛榮。
十大之中都有啲熟悉嘅名字，但係唔多，遠有意大利近有日本。其餘十大散佈在中美、南美、中東、非洲，以至南太平洋小國，包括巴西、巴拿馬、坦桑尼亞、敍利亞以至瓦魯瓦圖。地方係好，可惜似乎唔係好啱香港人口味啫……

2011LonelyPlanet'sTop10Countries