大家記唔記得泛民每年1月1日都會搞「元旦民主大遊行」？舊年就有三萬人上街撐雙普選。踏入2011年，今日剩得社民連堅持有搞作。對於希望見到香港一日「河蟹」過一日嘅人嚟講，今日可能係個好嘅開始。
百人踩單車示威
社民連呢排雖然因為「維園阿哥」單嘢搞到一頭煙，但無改佢哋用對腳支持社運嘅作風。佢哋今日下晝發起要求釋放劉曉波等人嘅「元旦單車遊行」。活動下晝1點出發，踩單車抗議，起點係銅鑼灣摩頓台公園，終點係西環中聯辦，活動歡迎市民參加，頂計會有100人踩住單車殺去中聯辦。
單車隊伍會有一批FM101嘅成員。有成員同八方講，今日會帶埋「香港完旦」嘅橫額空群出動。原來佢哋除咗認同活動嘅訴求，同時亦想趁機籌錢救急，令他們的電台可以跨越兔年。
莫非這個成立就快兩年、堅持開放大氣電波為言論自由把關嘅民間電台，正面對生死存亡嘅難關？起初，八方以為係阿爺落旨，或者煲呔同佢嘅手下出招打壓，想令不同聲音收聲（電訊管理局同警方就起碼兩次以電台違反《電訊條例》，上門抄家，將廣播同發射器材帶走充公）。原來今次係錢作怪：冇錢嘅話，就要自動收聲。事緣FM101由今個月開始，已經冇錢交租，加上成員梁穎禮早前狙擊商台《十八仝人愛落區》直播，被判罰款4,000蚊亦冇錢交，咁嘅財困問題唔解決嘅話，電台惟有封咪停播。
阿禮噚日就同八方講，現時FM101每月交租都要用成萬元，唔少有心主持雖然都有心理準備嚟緊要貼錢做節目。但所謂長貧難顧，所以都係要的起心肝籌款。佢哋已經開咗戶口（滙豐銀行：411-863509-838），歡迎市民捐款救急。
講番個單車遊行，社民連主席陶君行話，已經同單車舖搵定大約100架單車，有興趣參加嘅市民，到場交50蚊單車租就可以加入。為咗兼顧唔踩單車嘅參加者，大隊今日去到上環中山公園就會落地，再遊行去中聯辦。
mailto:[email protected]