啱啱擺完酒嘅丁太楊千嬅噚日接受商台訪問，講咗唔少擺酒前後嘅趣事，又公開同老公嘅甜蜜生活，佢話結婚前一晚丁子高一句甜言蜜語都冇講，只係不停講解結婚當日嘅流程。婚後佢都試過半夜為老公煮消夜，不過老公要求好高，煮一個麪又要醬料又要配菜。佢話未來一年都忙住做嘢，若果期間懷孕，佢會即時停晒工作安胎，等生完之後再做過。