"20蚊W捧黑池"
人總對現實諸多不滿，將之無限放大無病呻吟示於人前。頂級球員，喺現今世界，份工已經好到不得了，西甲球員怨新年冇假放要開工踢波，英超泰維斯、朗尼超高薪，卻唔願踢；自己私生活糜爛要冧番老婆湊仔女大晒，結果玩完一輪叫要走又話留隊，球會買佢哋怕，由佢哋。你睇吓曼城班高薪兵嘅嘴臉，先有長坐冷板既艾迪巴約，又來個恃才傲物、只有美斯勁過佢嘅巴洛迪利；今日佢哋迎戰季前被視大熱降班膽、如今成最強冷殺手嘅黑池，呢個9.5倍客W，新年必捧20蚊，賭波有邊個唔執着拗氣，有根有據用雞仔注嚟鋤強扶弱，睇住電視直播，呢啲都算係快樂足球啦！
"英甲王白禮頓穩過曼聯"
今日元旦波馬齊來，大摩隻「軍事攻略」上次初出即推介，前中段點跑大家上網睇番，山雨欲來跑梗頸四，今次尾場單W再捧，但起碼要有3倍以上；另呢個1哥倉隻三班馬「傾力之城」WP兼投甚穩兼有啲錢分，希望贏多少積吓波本。講番波，同馬一樣，唔理一線波定三線波，值博率極重要。今日早場，大家嘅目光一定係擂台躉曼聯作客西布朗，曼聯今季作客真係輸壞擁躉，今對住除黑池外、另一神經刀升班馬西布朗，個客W得1.46倍幾唔吸引；成晚咁長，肯睇少場，我建議大家將早場重心放喺英甲1哥、由普耶掌帥後表現躍進嘅白禮頓。早排英甲波係咁改期，白禮頓上仗雪到硬，主場踢少個都逼和查仔；今次匆匆再出主場對流嘢嘅奧連特，後者對上一場波已經係上月11日，唔係老馬，波未必有蓄銳一擊呢回事，狀態肯定不及白禮頓，呢個1.57倍主W加[-1]，我幾有信心。
"森林主場王唔怕追寶尾"
閒日放假一條冷去睇戲，係我十多年嘅習慣，雖然家自由行促進咗我哋零售同地產嘅繁榮，但唔好嘅真係香港哋乜嘢日子，周圍都係咁多人；但對比大時大節放假，仲算可以鬆一鬆，前日就即興睇番套正嘢《非常愛樂樂團》，一日一場，冇點大家，唔一定要睇首輪猛片乜乜試愛。賭波，唔止英超，英冠英甲有心水我都敢用同樣注碼押落去，今日11點場英冠森林，剛大炒隻羊打比郡，錄得主場30場不敗戰績，咁勁點可以畀佢停；相反兵源唔多嘅班士利，將要連績兩場作客兼係7日內第3場，森林主W1.53倍穩咯。
"阿奴作客點都值博"
阿仙奴主場鬥車仔成冷門，幾天前贏到小弟通頂都咁醒神；兩日後再戰韋根賠率熱透卻大變陣失手，冇法比仔始終差啲；今次呢位隊長停賽後復出，球隊再作客強隊剋星伯明翰，我點都堅持阿仙奴作客要進取啲買[-1]，又睇吓班阿伯撼完紅魔，呢鋪點頂？
"信莊家獅吼唔怕阿聯"
禮拜日澳職直播有榜首戰阿聯迎獅吼，上次提供獅吼，結果滂沱大雨僅和黃金海岸聯，失熱W；當起之輩作客到2哥阿聯，後者主場往績靚爆都畀莊家開個讓球平手高水，冇咁筍既，再捧隻獅單W射個終識得點贏嘅車仔[-1]，有4倍幾喎。
語錄：唞得耐未必着數，匆匆再戰未必蝕底，快車期，最重要兵厚同上戰點輸點贏啫，祝看官新一年賭得精明。
蘋果波神