民主黨噚日去政府總部請願，要求政府推出紓困措施抗通脹，行動搞得七七八八之際，啱啱嗌完口號嘅油尖旺區議員林浩揚突然變招，攞咗張「要求立法男侍產假」嘅標語出嚟，即場加開記者會，以過來人身份訴說港男冇侍產假嘅辛酸。
向平機會投訴
做緊全職區議員嘅林浩揚話，舊年6月佢嘅B女出世，太太同寶貝女月尾有一日要去診所做產後檢查，同日咁啱油尖旺區議會開大會。林浩揚於是入紙申請攞日侍產假，結果當然唔批，因為《區議會條例》同埋《區議會會議常規﹝範本﹞》，都冇寫明區議會可以此理由同意請假。
出爐爸爸唔忿氣，噚日仲向平機會投訴，指《條例》同《常規》嘅制訂者，即係政制及內地事務局局長林瑞麟，同埋民政事務局局長曾德成，違反《家庭崗位歧視條例》。不過，喺呢一刻，八方勸各位準爸爸，除非去間有侍產假嘅公司打工，否則不如儲多啲假，到迎接BB時咪唔使頭痕囉！