戰神快過拉利　3秒爆上100km/h

已上神枱國寶級嘅日產GT-R，繼Spec-V版後，2011全新改良版火速到港！戰神今次引入唔少Spec-V配件之餘，馬力仲Upgrade到530匹，日本實試0-100km/h僅需3秒，比F430、F458Italia仲要快！學飄移王James話齋：「好離譜喎！」

記者：徐影龍
攝影：林栢鈞

賣相保守性能激進

07年GT-R脫離Skyline獨立後，對市場猶如投下一顆震撼彈。7萬美金車價，居然可打破Porsche喺紐堡靈嘅圈速紀錄，日系跑車攞盡Face！後繼款Spec-V落齊賽車料，馬力多少少但貴幾十萬港紙，可惜未能將GT-R再次升溫。
老實講，新版賣相好保守，近乎無改款，喺街遇到佢都未必知道係新款。不過骨子裏團火先犀利，引擎輸出勁加50匹，調升至530匹。喺引擎、波箱、懸掛精心調校下，0-100km/h加速榨到僅需3秒，仲要係全原裝配備，普羅大眾依然可以當代步車，連玩開飄移同改裝房車賽嘅James，聽到後都打個突，認為勁得好離譜！咁嘅規格，唔只令一眾歐系超跑有壓力，車價仲要抵玩到140萬有交易，只比當年普通版貴十零萬。相信今次迴響會大過Spec-V好多，應該引到唔少人升級換車！

■換上Dunlop高性能胎及Rays鍛軨，靚得嚟可減磅4kg。

■尾翼造型有所改變，襯托經典四圓尾燈，更有台型。

新模式針對大長途

連GT-R代表人物錢嘉樂，都認為舊款GT-R電腦Set得太好，要快、要圈速無乜難度，唔夠好玩。
嚟到新版，James由將軍澳至繞道來回淺嘗，跟舊款嘅最大分別，係頭泵把左右各加上三條擾流坑，作用係增加10%下壓力，以及將風阻系數下降至0.26cd。另配潮興嘅日間照明燈，望真啲又真係越嚟越有歐系跑車Feel。內櫳佈局無大改，中控台輕觸屏幕仍然多功能到爆，較特別係Comfort模式之外，我最鍾意將雪地模式改成節省模式，揸長途車更慳油，加上引擎同氣喉無咁嘈，整體柔順易Control得多，非職業車手都唔怕性能過度Over而失控。
2011GT-R分三種級數，目前到港屬最入門級PureEdition版本，其餘更高級版本分別係內櫳設備，如Recaro桶椅、BOSE喇叭及皮色自由配搭等。