話咁快又一年，過去三年都以高價投得「日本一」藍鰭吞拿魚王嘅板長壽司老闆鄭威濤（Ricky），繼舊年（2010年）以140萬港元投得意頭魚後，又準備喺下星期再出馬，去日本東京築地魚市場，參加5號朝早舉行嘅拍賣會。
藍鰭吞拿魚近年瀕危，連日本早前都有示威活動，仲有套電影呼籲日本人唔好再殺咁多藍鰭吞拿魚，今次Ricky又去競投，八方問佢怕唔怕俾環保組織鬧爆？佢自辯話：「我都明白，但都要照顧其他顧客口味嘅，好多人都想食。如果日本政府真係禁咗，我哋就唔會參與競投。」雖然可能會被當地魚販狙擊，但佢仍會起用舊買手，「冇話志在必得，但就冇諗過budget（預算）問題」。