千億新抱徐子淇近日盛傳懷咗雙胞男胎，佢老爺四叔噚晚出席元旦倒數活動時，終於證實新抱懷孕，算係跨越2010同2011年嘅喜訊。佢笑住咁話，子淇「肚都大咗」，不過由於只係有咗兩、三個月，所以未知今次係咪孖胎，亦唔知係仔定女。
坦言再生女會唔開心
四叔恨抱男孫係人都知，佢噚日流晒口水咁話，新年願望係多添一個男孫，講到明，如果子淇到時生女會有啲失望。
子淇再傳喜訊，四叔笑逐顏開，佢話會到時獎勵乖乖新抱，家新抱日日食花膠補身，不過噚晚氣溫得10度左右，子淇就未有現身倒數活動，但四叔一啲都唔寂寞，因為佢其他兒孫都出席。四叔話大仔家傑嗰三胞胎，個個都好精靈，仲開始識認人。