早幾日，慳妹攞住份email同敏妮講，家陣業主都有保險保障。敏妮頭上出現無數問號，業主一直都要買保險，最簡單做按揭時銀行都一定要業主買火險。慳妹話：「呢隻保險係防租霸o架！」保險市場都真係幾與時並進。
睇清楚保障項目，包括租客破壞單位嘅維修費、維修期間冇咗嘅租金收入等。一年保費最少都成千蚊，出事仲要業主先畀墊底費，至於維修費同維修期間嘅租金損失，最多賠10萬蚊。採取法律行動追番啲租同收番層樓，同樣最多賠10萬蚊。其實家陣市面上都有類似嘅計劃，如果遇到租霸搞破壞，業主可以得到賠償。買唔買？買邊間嘅保險？都要計吓數。
出事業主要畀墊底費
首先呢個新推出市面嘅保險計劃，只係得兩個plan揀，分別在於包唔包第三者索償。問題就嚟嘞，一層300呎嘅樓同一層3000呎嘅樓，維修費、每月租金你話一唔一樣？業主唔好彩遇到租霸，買咗呢份「防租霸保險」，係就係裝修過間屋時有最多10萬蚊幫補吓，但業主同時要畀一個月做墊底費，你係租霸，都預咗唔交租咯，你會揀間蚊型舊樓租，抑或優質大單位住？一層似樣啲嘅樓，租金都萬幾兩萬，即係業主實收賠償金額得幾萬蚊。
講到法律訴訟費用嘅索償，欠租唔多過5萬蚊，去小額錢債審裁處搞，涉及嘅法律費用都係幾百蚊。再講，01年新修訂嘅《租務條例》，租客欠租超過15日就已可以取消租約，按《租務條例》啟動收樓程序。
其實保險係買個保障，好多業主買樓收租，都會將層樓執得「靚仔」啲，博租得好價錢，其實唔介意畀多少少買份保險保障自己，事關羊毛可以出自羊身上，成本喺租金反映。保險公司有心推出保障業主嘅產品，不妨畀多啲選擇。
溫敏妮
http://wanmanli.com/blogs/