隔牆有耳:2010年A-Z大事件 - 李八方

隔牆有耳:2010年A-Z大事件 - 李八方

睇埋今晚維港煙火倒數,2010年就拜拜。今年喺平淡之中發生好多件前所未見嘅事:有港女被判監全城叫好;首富被斥係魔鬼;樓價逼近97年高峯;馬尼拉旅行團被脅持慘劇。另一方面,煲呔搞掂民主黨通過翻叮政改方案,剩低嘅任期已經叠埋心水拎住部iPad乜都唔搞,只係縱容手下繼續打壓維權人士。趁住除夕,就同大家由A至Z重溫今年嘅大事。

《A》
Amina

醉駕摑警嘅Amina上星期因為違反感化令被即時判監六星期,要喺大欖女懲教所過聖誕同新年。佢嘅名句「Iwanttoleave」,或者要由今年年頭摑警,喪嗌到出年年初放監為止。
Amina係終審法院常任法官包致金嘅姪女,佢年初醉駕炒車後,拒絕接受酒精呼氣測試,仲發酒癲兜巴星到高級警員鄧文偉「啊」一聲跌咗落地。呢巴打得鄧sir好傷,片段播出街,搞到女友覺得佢懦弱無能毅然分手。
法官親戚有三次擊警紀錄,法官阮偉明喺8月輕判Amina接受感化一年、罰款8,000蚊同停牌一年,唔使坐監,仲話佢係病人唔係壞人。有網民眼見社運人士揩到吓警察都襲警罪成要坐監,狠批權貴嘅親屬犯事斷正都可以甩身冇事,喺fb開群組狂聲討。
法庭今個月跟進感化進度報告,發現Amina違反大部份感化條件,判即時收監六星期。Amina入冊過聖誕新年,呢句「Iwanttoleave」大可以踎喺監房嗌餐飽。

《B》
Baby

科幻過電影《盜夢空間》(Inception)。龍頭地產財閥四叔家族,成功將起樓發水嘅神乎奇技「殖入」生仔呢個領域。四叔大仔李家傑,今年有傳喺美國買卵借肚,透過商業代母「住家繁殖」,一索得三男。三位BB取名智信、智仁、智勇,趣致可愛。
生仔都可以發水生到盡,四叔終於一償抱男孫嘅心願,話開心過賺大錢,向員工大派3,300萬利是,寓意生生不息。不過借肚生仔備受爭議,天主教批評咁做不尊重生命、小市民都質疑係咪有錢大晒。終於禍從肚出,警察懷疑有人違反《人類生殖科技條例》,今個月初話會接手調查,搞到喜事隨時變刑事。不過外界猜度,警方可能只係做場大龍鳳,好難有證據拉任何人。

四叔手抱三名乖孫,左起係老大智信、老二智仁同老三智勇。

《C》
Cantonese

八方唔似某啲人咁,對粗口天生敏感。甚至覺得,有時俾人欺壓到牆角,嬲到爆粗都唔過份。就好似今年7月廣州籌備河蟹亞運期間,有啲政協竟然建議要將當地電視台主要頻道由廣州話改做煲冬瓜廣播。冇耐東莞官方連袁崇煥紀念園內嘅石像都唔放過,拆咗嗰塊刻有佢帶兵打仗口頭禪「掉哪媽!頂硬上!」嘅銅牌。
「推普廢粵」殺到埋身,「不願做奴隸」嘅廣州人起來反抗,無懼政府打壓,事先將集會定性為非法活動,依然有過萬人齊齊喺7月25日去到江南西地鐵站外「散步」。萬人疾呼「掉哪媽!頂硬上!」「普通話,收皮」,滿街理直氣壯,粗口橫飛,真係何其壯觀呀!
搞手就用絲襪笠頭免被公安點相。當日唔少香港80後都有北上廣州齊撐廣府話,有港人仲一度被公安扣留。年輕人齊唱Beyond名曲《光輝歲月》,直到傍晚公安清場。粵港同心「掉哪媽」,相信呢一日,咁嘅粵港合作嘅歷史!班外省高官見眾怒難犯,廣東省委書記汪洋早前先發過聲明話要推廣普通話,到8月頭就轉軚話:「我都在學廣東話,誰敢廢粵?」

7月25日廣州萬人上街掉哪媽,撐廣府話。

《D》
Democracy

起錨定超錯?人生有幾多個十年?偏偏香港人爭普選都爭咗廿幾年,共產黨就死攬住權力唔放,2007、2008普選承諾冇咗,港人年年月月上街,佢先至拋多張空頭支票出嚟,話2017、2020可以普選。
今年表決嘅政改方案,叫做邁向2017、2020普選嘅中途方案,點知煲呔先係舊年11月翻叮05年嘅廢柴方案,功能組別取消無期,反而加碼、加多五席區議會功能組別,完全漠視港人嘅民主訴求。
政府無能,於是乎公投五俠起義,公民黨梁家傑、陳淑莊、社民連長毛、大嚿、毓民五位議員冒住土共炮火前進,辭職發動五區補選變相公投。可惜白鴿黨縮沙、建制派龜縮、煲呔重淆底到連票都唔敢投,最後有57.9萬人投票,效果未如理想。
5.16公投過後,輪到煲呔出動,率領問責官員落區喪嗌起錨,點知師奶質問終點喺邊,正義教師挑戰唐唐、鬍鬚曾話「我要有權選特首」、政改方案「超錯」。煲呔單挑民主女神余若薇辯論,締造一場史上最強弱懸殊嘅電視辯論。最後白鴿黨成為中聯辦入幕之賓,傾掂數畀區議會功能組別由區佬提名,全民直選,喺一片爭議聲中,通過一個政改爛方案。

《E》
Exco

行政會議成員劉皇發喺政府推出穩定樓市措施前,多次買賣房產唔申報,只肯道歉唔辭職。

《F》
Fund

煲呔宣佈成立由富豪捐款100億關愛基金。被認為是要幫商界「賺到盡」令社會產生仇富洗底。

《G》
Guide

惡導遊李巧珍狂罵唔喺指定商舖購物嘅內地團,片段被放上網引來中港兩地關注。惡珍其後公開道歉後被罰釘牌。

《H》
H1N1

舊年豬流感來勢洶洶,政府用2.3億公帑買入300萬劑H1N1豬流感疫苗,但副作用風險令九成疫苗過期作廢要銷毀。

《I》
iPhoneiPad

潮人玩具年中抵港即熱賣狂炒。其中iPhone4長時間缺現貨,並成為歹徒街頭搶劫重點。

《J》
Jason

馬尼拉人質事件受嚴重槍傷嘅Jason,回港醫治後正在康復。事件共釀成八死七傷,包括Jason嘅父親及妹妹。

《K》
K.Oten

最勁時有一萬個學生跟住嘅補習天王范浩揚(K.Oten),欠落1,200萬違約賠償、利息及律師費,11月被頒令破產。

《L》
LiKaShing

八方掙扎咗好耐,L應該屬於李嘉誠好,定係羅國輝神父好?誠哥年內做咗無數咁多感動香港嘅好人好事,若然八方唔喺歲晚加以表揚嘅話,實在對唔住香港人,亦都對唔住國家。
國家主席胡錦濤9月南巡,主動接見李首富,上演一幕扣人心弦嘅經典場面。堂堂胡主席對住李首富話:「不管時間長短,我總是要跟李先生見一見面、聊一聊。」胡主席叮囑李首富繼續為保持香港長期繁榮穩定作出更大貢獻。阿爺開到聲,豈敢不瞓身支持?於是乎,為唐唐競逐下任特首而度身訂做嘅關愛基金一出爐,李首富即率先響應,認捐5億。大拿拿5億喎,不知要起幾多發水樓先賺得番。誠哥咁慷慨解囊俠義心腸,竟然有神父仲鬧佢係魔鬼,好快就有高級神職人員出來幫誠哥平反。
10月份,超強颱風鮎魚整裝待發,密謀襲港,政府各部門吹行晒雞話要高度戒備。終於傳說中嘅李氏力場再次發功,將鮎魚打殘成鹹魚,再一次抵禦咗境外勢力嘅挑戰。

胡主席南下深圳,話唔理時間長短都要見吓李嘉誠。

《M》
McDonald's

麥當勞推大富翁遊戲促銷,被質疑故意唔公佈已經送出大獎。

《N》
NobelPrize

一句「我無罪」,劉曉波令好多港人肅然起敬,亦成為港人由年頭撐到年尾嘅風雲人物。當呢位《零八憲章》發起人之一,今年2月被內地法院終審維持監禁11年嘅無理裁決後,香港人一直為佢奔波。帶病在身嘅華叔年初幾度堅持上街,身體力行要求中央放人;年中嘅毋忘六四紀念集會,亦特別加入「聲援劉曉波」主題,維園內15萬港人都用燭光向身陷囚牢嘅劉曉波送上支持。
當劉曉波喺年尾獲得諾貝爾和平獎,最終仲空凳領獎。80後葉浩意就同其他年輕人為劉曉波去中聯辦開香檳慶祝,香檳泡沫濺到中聯辦保安,點知警方小事化大,拉人兼控普通襲擊罪,好彩當局後來知衰,主動撤銷控罪,冇令香港多一單寃案。

《O》
Octopus

八達通被踢爆出賣「日日賞」客戶個人資料,九年勁賺5,790萬。

《P》
Property

財爺曾俊華上月推新招壓炒樓,兩年內轉售要額外畀5%至15%不等嘅印花稅。

《R》
Radio

商台接受民建聯贊助60萬製作《十八仝人愛落區》被狠批見錢開眼,其後廣管局裁定違反業務守則,罰款6萬蚊兼腰斬節目。

《S》
SAR

特區政府要申辦2023年亞運,不惜安排黃金寶等運動員到立法會陳情,但開支變幻無常、一時一樣,仍然堅持下個月申請撥款。

《T》
TVB

無綫電視業務總經理陳志雲3月被廉署拘捕,9月被控貪污等罪名。控方竟於上月話難以入罪,撤銷佢同前助手叢培崑部份控罪。志雲大師跟住返無綫復職,佢被捕初期講嘅「真的假不了,假的真不了」,如今嗒落有味。

《U》
University

暫放中文大學嘅新民主女神像(圖),穩陣到打大風都吹唔郁,但非常惹火,特區政府一直虎視眈眈想收歸己有,係咪政治審查大家有眼睇。
雕塑家陳維明為六四事件製作嘅新民主女神像,5月入境即時俾海關扣查,支聯會交涉先至放行。
到5月29日支聯會將民女送去時代廣場公開展覽,食環署突然以未領娛樂牌照為理由,call埋警方一齊禁止民女亮相。支聯會成員組成人鏈護女,但敵唔過當局人多勢眾,民女最終被強搶,喺北角警署扣留咗兩日先至獲釋。警方本來要控告13名支聯會成員「阻差辦公」,後來忽然放人,惟獨其中嘅李耀基就被食環署控違反《公眾娛樂場所條例》。
民女之後嘅落腳點繼續有爭議。事關中大學生會好歡迎民女長駐校園,但前校長劉遵義為首嘅校方反對,又掀起護女戰,到下半年新校長沈祖堯上場,民女得以暫放喺中大,但永久放置地點仍未傾掂,2011年隨時又要為新民女保駕護航。

《V》
VictoriaPark

維園舉行嘅《城市論壇》因為一批維園阿哥嘅出現被活化,推翻過往維園阿伯大晒嘅生態。但鬧出馬草泥涉嫌強姦案,論壇會由邊方人物主導有待觀察。

《W》
Wages

全年最令打工仔㷫烚烚嘅人物,應該數到主張最低工資20蚊嘅「廿蚊張」張宇人,同扣起飯鐘錢抵銷加人工嘅大家樂老闆陳裕光。兩人事後都收回言論。

《X》
X富商

前亞運港隊划艇選手陳學殷涉以性愛片段勒索X富商300萬案件,被勒索72歲商人,他出庭時仍然為陳學殷求情。

《Y》
YouTube

今年經常喺YouTube上載片段踢爆警方蛇王、有法不依又專恰老人家嘅極丑惡,一度被警方網上起底同公開未經證實嘅樣貌。但極丑惡喺網民支持下繼續對付違規警員。

《Z》
2011年

預計維港兩岸40萬人倒數送走2010年,2011年新年快樂,希望大家繼續支持。

mailto:[email protected]