最近出街要帶多副黑超眼鏡，唔係扮型，係睇3D電影。呢輪猛睇3D電影，睇到儍咗。我其實好想睇普通菲林版，但附近冇戲院做緊，英語版都冇，惟有睇粵語配音版。過去十年八年，成日陪個仔睇粵語配音嘅卡通片，好嘞，家個仔大嘞，話呢啲片「低Ｂ」，唔肯陪我睇，惟有自己顧自己。
《毛百萬》明顯係循環再造嘅再生片種，用3D嚟包裝。人物造型脫不掉《超人特攻隊》的影子，當然仲有好多超乜超物、乜乜俠的影響，無謂逐一表述。唯一的新意是這個毛百萬自出娘胎（佢其實係星球人降世）就被標籤為冇鬼用，於是大吓大吓就選擇咗做壞人，即是細細個想做警察，做唔到，結果大個做咗歹徒嗰隻。
但毛百萬這個角色最有趣的地方是從大奸角蛻變成正義英雄，而原來的死敵萬人迷超人，卻看透世情唔肯再玩，當中愛情的慰藉是最大關鍵，正所謂英雄難過美人關！
撰文：黃國兆