中國羽壇公認嘅「神鵰俠侶」林丹、謝杏芳喺兩星期前已經註冊結婚，結束咗6年嘅愛情長跑。原來「丹芳戀」呢對姊弟戀情嘅開始，係靠影星周星馳嘅名作《唐伯虎點秋香》，細謝杏芳兩歲嘅林丹，竟然將華安嘅角色當係自己，將謝杏芳當作秋香，成日猛叫謝杏芳做「秋香姐！秋香姐！」，憑呢招終奪得杏芳嘅芳心，譜出一段艷羨世人嘅戀曲。
林丹、謝杏芳兩人嘅戀情曝光始於04年湯姆斯盃上，當林丹為中國喺男團決賽獲勝後，他即時奔上觀眾席親吻謝杏芳，呢個「世紀之吻」令全世界嘩然，同時各界亦盛讚林丹勇敢直接，同佢喺羽毛球場上狠狠地直接撲擊對手如出一轍。林丹呢種單刀直入嘅作風，亦令謝杏芳極為受落，就好似喺周星馳嘅《唐伯虎點秋香》入面，華安多次以單刀直入攻勢向秋香示愛，終抱得美人歸嘅完美結局。
猛叫謝杏芳「秋香姐」
27歲嘅林丹除咗性格，似足由星爺飾演四大才子之一嘅唐伯虎，為咗追求華府四婢之中最靚嘅秋香，所以不惜扮家丁華安，混入華府，亦無懼石榴同埋武狀元等人嘅阻撓；「超級丹」亦似足華安嘅面皮咁厚，多次明刀明槍咁向鞏俐飾演嘅秋香示愛，並且事無大小都猛叫「秋香姐！秋香姐！」，時刻都要纏住佢。
呢個情節亦由家已經榮升林太嘅謝杏芳承認：「佢（林丹）追我時，我唔係幾知道呢個情節，只係佢成日當住眾人面前，猛叫我『秋香』，我估計佢係鍾意周星馳嘅《唐伯虎點秋香》套戲啩！」29歲嘅謝杏芳仲唔認為自己特別難追，覺得林丹用呢條橋追佢，主因或者係林丹係周星馳嘅粉絲！仲話其實當初唔覺得林丹係佢最鍾意嘅類型，只係畀佢直接嘅性格所感動。嘩！如果係咁樣嘅話，星爺咪就係佢哋兩個嘅媒人？！