過一個白雪紛飛的除夕新年，係好多人的渴望。講真，大雪到好似英國紐約咁我又唔想，但凍冰冰過新年又好似好有feel。動一動腦筋，雖則天氣做唔到，但去澳門可以食出白雪雪的葡式除夕夜。
記者：蕭漢祥
攝影：楊錦文
Model：EagleLo
食出歐陸味
$68海鮮飯抵得過份
打開澳門旅遊書，八成半版面都係介紹食肆，難怪每次去澳門玩，目標好清晰，就係食……食……同食，尤其大除夕更要擦餐好。金壘葡菜餐廳，今年4月才開業，位置幾「吊腳」，在龍嵩正街司法警察局斜對面，一般遊客好少會經過，餐廳主要做熟客和街坊生意……熟客？開店才半年多，已經儲得一班街坊熟客？咁就要試吓。餐廳總廚波哥，入行四十年，曾在港做廚，任職過不同菜式的餐館，他笑說他的葡菜已經集大成之優點。
打頭陣的有燒乳豬和焗豬扒飯，燒乳豬香港都有啦……不過波哥的乳豬並非用燒爐燒熟，而係用焗爐，優點是肉汁可以保存在乳豬入面，肉身唔會乾唔會硬。至於焗豬扒飯，就花了波哥不少心機，齋係醬汁就用上近五個鐘熬製，豬扒以鬆肉粉烹調，令豬肉鬆軟好味，再加入小量白豬油炒蛋的飯底，入口一試，真係小記平生食過最好味的焗豬扒飯！到此，原來波哥的撒手鐧還未出場，一道西班牙焗海鮮飯，單睇賣相已大殺四方，只見一碟飯裏有原隻肉蟹、青口、帶子、魚肉、蝦等N咁多種海鮮，非常足料！飯底用上鮮茄汁、橄欖油和洋葱等製成，最後還有最邪惡的芝士，整道菜惹味到不能形容。最關鍵是，這道焗海鮮飯只係$68，抵食得過份。
陸軍俱樂部 嘆高檔葡菜
男士們，大時大節同女友或目標女友去玩，食葡國菜當然要食高檔啲，不少澳門人推介陸軍俱樂部，餐廳內內外外都是影相位，充滿殖民地色彩。雖然餐廳並非新開，但過去只招待會員及「被邀請的人」，現在已經對外開放啦。連的士司機都話呢度最出名係燒大蝦伴番茄飯及非洲雞伴薯仔沙律，大蝦番茄飯賣相靚，食落發現番茄飯好特別，原來是先將番茄汁混入煮飯，然後炸成金黃色飯糰，味道香脆兼開胃；非洲雞的醬汁用上椰漿、洋葱及辣汁，令我對葡國菜有多一重認識。
（e）金壘葡式美食
地址：龍嵩正街8-G地下
電話：（853）28355931
（f）澳門陸軍俱樂部
地址：南灣大馬路975號
電話：（853）28714000
三百蚊有找松露Buffet
新年大餐都係想食buffet？推介漁人碼頭旁的萊斯酒店，怡景餐廳提供的除夕夜自助晚餐，唔使三百蚊，香港山旮旯酒店食都唔止呢個價啦。菜式有燒原隻南非火雞、葡式燒乳豬以及美國肉眼扒、法式黑松露焗蟹蓋等矜貴菜食。Buffet由7pm至11:45pm，食完啱啱好行出去同大家倒數迎2011年。
（g）怡景餐廳：澳門漁人碼頭萊斯酒店大堂
價錢：除夕夜自助晚餐成人$298、小童$198
酒店網頁： http://www.rockshotel.com.mo
食出白雪雪新年
激新!凍過2011爆爆珠
除夕夜氣溫8-15℃，想再凍多兩錢，過一個凍冰冰白色除夕夜，我帶大家去食……雪糕！仲有2010年代同1960年代新舊口味揀!
最新的有12月頭先開張的YogurtBean，主打乳酪雪糕。老闆李太說，整乳酪雪糕最重要係雪糕機，所以特別從意大利訂購一部乳酪雪糕機，花了14萬元，味道係咪唔同啲？此機做出來的乳酪雪糕，溫度較凍、口感較結實，內裏好似冰粒混在雪糕內，感覺似食雪葩；李太更從意大利和日本入口乳酪雪糕粉，無咁酸較易入口。配料除了特別推介M&M朱古力豆和焦糖爆穀，還有好得意的爆爆珠，有芒果、益力多味等，入口輕輕一咬即爆很好玩！新張期間，買細杯都會多送一款配料。
（h）YogurtBean
地址：白馬行國華戲院商場天神巷M舖
經典！60's雪糕椰味真實
天神巷有最新的乳酪雪糕，荷蘭園有最經典的雪糕磚。單睇禮記門面，就已感受到充滿六十年代風味，尤其門口的雪櫃，簡直就唔係呢個年代應該見到的產物。但店員話老闆唔容許影雪櫃，吓……？講番雪糕，椰子、花生等口味的雪糕磚都係經典中的經典，試了個椰子味，味道似椰汁加椰肉打碎再雪藏的雪糕，口味真實，超市盒裝雪糕那種調出來的味道絕對無得比。另一必試是細細盒的三文治雪糕，威化夾着椰子及蜜瓜味雪糕非常香，那個手畫封面的小盒，幾乎是每個客人必影和靜靜雞袋走之物。
（i）禮記雪糕
地址：荷蘭園大馬路12-12A地下
