今日係31號，即係2010年嘅最後一日，聽日就係新一年嘅開始，喺新一年開始前夕，金管局總裁陳德霖（圖）有樣嘢要提提你，就係百分百存款保障將會隨着今年嘅完結成為過去，明年開始存保額只係得50萬蚊。
如果閣下銀行有700萬蚊存款，請記得自己做好準備，否則有咩「衫長褲短」，咪話人哋冇提你！
咁點解要溫馨提示呢？即係咁，喺新嘅存保制之下，同家陣嘅百分百存保係唔同嘅，新制之下，有限制牌照銀行同埋接受存款公司唔再係存保計劃嘅成員，存放喺佢哋度嘅存款唔會再受到存保制保障。
之前保埋佢哋啲存款，都係因為金融海嘯令全球立立亂，金管局先推出應急措施，費事啲存戶擔驚受怕。
總之，做個精明嘅存戶迎接2011年，祝大家嘅存款可以完完整整喇！