葉劉淑儀組成嘅新民黨早前向建制派獨立議員招手，同佢好啱嘴形嘅資訊科技界譚偉豪係重點游說對象，可惜譚偉豪鍾情「拍散拖」，覺得同另外四位獨立議員得閒行埋仲疏乎，惟有婉拒葉劉。但原來葉劉未死心，譚偉豪引述葉劉當時表明，會等到佢入黨為止；呢種癡心真係唔係人人做到。
雖然譚偉豪講到明若2012年再參選兼成功冧莊，會考慮放棄自由身搵個好黨共諧連理，但新民黨未必係佢心水之選，因為五散人屆時唔排除組黨；做生不如做熟，葉劉等到呢位「如意郎君」嘅機會睇嚟唔大。雖然結唔成婚，譚偉豪同葉劉仲有好多擦出愛火嘅機會，例如兩個都好支持另設「創新科技局」，呢個更加係譚偉豪決定支持邊位特首嘅主要考慮，擺到明係講畀一眾疑似特首候選人聽啦。