香川真司（圖）可以話係上半季最紅嘅日本球員，幫多蒙特頻頻入波，亦令到球隊暫時喺德甲榜首領先。當然，國家隊教練沙哲朗尼亦有眼睇，決定將懸空咗一段時間嘅10號球衣交畀佢，出戰下個月初嘅亞洲盃。以前嘅10號仔，好似名波浩同中村俊輔，都係國家隊嘅好波之人，甚至係靈魂人物，今次香川作為繼承者，表面上已經係對佢嘅實力一次肯定。