就快到2011年，香港有乜新氣象，八方唔係麥玲玲，唔敢預測，但可以肯定嘅係，近三萬名警務處員工對新一年好有期待，因為2011年1月11日五條1，將係一哥換人、鄧去曾來嘅日子。八方咁講，唔係話所有警務人員都唔鍾意現任阿一鄧竟成，只係對於未知嘅將來，人通常都會有啲期盼。
員方高唱《問你》
雖然坊間戲稱鄧竟成做SorrySir，但警察員方代表對呢位回歸後第四任警務處長嘅評價，都唔係咁一面倒。聖誕前鄧竟成喺官邸搞咗個園遊會，邀請咗四個員方組織嘅代表聚一聚，過去同管方撐到行嘅警務督察協會班理事居然即席為一哥而歌，集體創作，將金曲《問我》改編成《問你》，送畀鄧竟成：
「問你歡呼聲有幾多？
問你悲哭聲有幾多？
你如何能夠，一一去數清楚。
問你點解會高興？
究竟點解要苦楚？
你笑住回答，講一聲：『我係我！』
無論你有百般對，或者千般錯，
全心去承受結果。
面對政棍威嚇，那怕會如何，
如今一切交收妥。
問你得失有幾多？
其實得失不必清楚。
你何曾能夠，一一去數清楚。
願你當差去到終結，
無論歷盡幾許風波，
你仍然能夠講：一哥我做過。
你仍然能夠講：一哥就係我！」
嗰句「政棍威嚇」，令八方諗起立法會討論高鐵撥款期間，曾傳出有建制派議員驚被人圍，打電話畀一哥施壓嘅事件，但有份改歌詞嘅督察協會主席廖潔明話，呢度只係泛指同類事件。一哥對於獲得臨別贈歌，亦好受落，當時仲即場獻唱陳百強嘅《一生何求》回應，以表心迹。
唱《一生何求》回應
留意吓歌詞，就會發現一哥唱《一生何求》好應景，好似「沒法解釋得失錯漏，剛剛聽到望到便更改，不知哪裏追究……」有理由相信佢係唱出回望任內種種嘅心聲。
雖然鄧竟成喺警隊內部民望不及上一任嘅李明逵，任內又發生旺角警署強姦案、人肉路障截飛車等鑊鑊新鮮鑊鑊金嘅事件，但廖潔明認為，嚴格嚟講呢啲要一哥saysorry嘅事件，都唔係直接因為一哥犯錯。
接班人被視為鷹派
至於繼任一哥嘅曾偉雄，警隊內部唔少人認為佢係鷹派。做落就知佢係咪真係咁「鷹」；如無意外，51歲嘅佢將可能成為任期較長嘅一哥，有機會做足五年。
mailto:[email protected]