劉德華前晚繼續舉行第9場紅館演唱會，請來靚媽陳慧琳（Kelly）做嘉賓。Kelly在台上自認湊仔叻，華仔則自讚湊女更叻，但當Kelly讚華仔的專一已絕種時，即中華仔講感情的死穴，嚇得他登升降台走人。
劉德華前晚請來陳慧琳擔任演唱會嘉賓，華仔介紹她出場時大玩香艷說：「呢個女仔我認識好耐，而且試過同佢浸埋同一個浴缸。」全場起哄，着露膊泰山裝的Kelly步上舞台時，華仔對她說：「今日請你嚟希望你喺大家面前講我幾句好話。」Kelly即O嘴說：「你乜嘢都好叻，不過我有樣嘢可能叻你少少。」華仔搶答：「你除咗生BB叻過我，有乜嘢叻過我？」Kelly答：「湊仔。」華仔不甘示弱：「我湊女呀！」
Kelly不明華仔指的是湊女fans，以為他講湊BB女，故她說：「如果你生女，我就叫蝦餃仔媾你個女；如果你生仔，我都即刻博個女。」華仔抵死說：「如果你有個女，我點都會keep住，等我追你個女。」
獲讚專一急腳閃人
Kelly稱若華仔有兒子，單是遺傳父親的專一已世間少有，她說：「呢種男人已經絕種。」此話一出，華仔即上升降台鬆人，Kelly笑說：「未講完就走。」接着她便獻唱《明星》。
前晚華仔唱《Standup》幾度走音，但無損觀眾熱情，他瞓身狂唱狂跳，興起時還向觀眾大叫：「夠未？睇吓你死定我亡！」前晚舒淇專程捧場，至於剛被拍得探華仔班的華嫂朱麗倩，不知有否如常隱身觀眾席。
撰文：夏琴
