期指結算前夕，港股成交冇乜大變，得400億左右，不過恒指就反彈347點，報收22969，雖未上返23000樓上，但恒指向上拋離100日線，股民嘅心理會定啲。
花旗股市都係窄幅上落，道指升20點，不過樓價弱加埋消費信心跌，指數仍可推上，反映由月初開展嘅升勢好大機會維持。
明日係年結，全球股市會唔會有最後一擊嘅櫥窗粉飾活動好快就知，亦會為下禮拜新一年市況開始提供啟示。
交行C輪20944：交通銀行（3328）報收7.82元，升1.69%。股價嘅升幅唔算大，但係微穿10日線係好嘅發展，短線上試8.40元機會唔細，短炒可以諗吓隻C輪20944，博正股破位炒上9元。
隻輪現價12.7仙，2012年2月6日到期，行使價7.40元，溢價10%，引伸波幅34.1%，槓桿率6.5倍（有效4倍），正股升上9元，20944睇21.6仙，升幅達7成，如果正股跌穿7.40元就沽咗隻輪計數。
俊樺