新任港澳辦主任王光亞噚日係北京同參加「清華大學香港教師國情培訓計劃」嘅教師舉行座談會，乘機引用井水不犯河水論教訓香港人，但其實現場有啲教師嘅言論，一樣令人大開眼界。好似係英華書院王穎老師就話，佢覺得香港回歸以來搞國民教育算唔錯，但香港傳媒就硬係鍾意報道偉大祖國嘅負面消息，搞到原本因為奧運、世博加強咗嘅國民意識，又畀傳媒打殘，王老師叫港澳辦可唔可以對傳媒「做多一點工夫」喎。
八方聽到王老師叫王主任出手整頓香港傳媒，覺得佢其實都唔使上國情研習班，因為佢連北京習慣干預傳媒報道果一套做法都認同，已經夠晒條件做一個「愛國愛港、擁護中央政府」嘅好老師。